Брытанія, якая старшынствуе ў Радзе Бяспекі ААН, склікала на аўторак, 5 красавіка, пасяджэнне Рады Бяспекі для абмеркавання масавых забойстваў у Бучы Кіеўскай вобласці, якія, верагодна, былі здзейсненыя войскамі Расейскай Федэрацыі. На паседжанні выступіў прэзідэнт Украіны Уладзімір Зяленскі і заклікаў выключыць Расею з Рады ААН у справе правоў чалавека.
На паседжанні Рады Бяспекі ААН абмяркуюць павелічэнне колькасці доказаў ваенных злачынстваў, у тым ліку з Бучы. У Брытаніі абяцаюць выкарыстоўваць старшынства краіны ў Радзе Бяспекі, каб забяспечыць празрыстасць, падсправаздачнасць і справядлівасць.
«Усе партнёры Украіны будуць падрабязна праінфармаваныя пра тое, што адбывалася на часова акупаванай тэрыторыі нашай дзяржавы. Ваенныя злачынствы ў Бучы ды іншых гарадах падчас расейскай акупацыі будуць прадметам разгляду і ў Радзе Бяспекі ААН у аўторак»,
– зазначыў прэзідэнт Украіны Уладзімір Зяленскі.
Падчас паседжання праз відэасувязь выступіў украінскі прэзідэнт Уладзімір Зяленскі. Ён абвінаваціў РФ у забойствах, згвалтаваннях мірных грамадзянаў Украіны:
«Цяжка знайсці такое ваеннае злачынства, якога б акупанты там не здзейснілі. Расейскія вайскоўцы шукалі і мэтанакіравана забівалі кожнага, хто служыў нашай дзяржаве… Яны забівалі цэлыя сем’і – дарослых і дзяцей».
У канцы сваёй прамовы Зяленскі заклікаў ААН выключыць Расейскую Федэрацыю з Рады ААН у справе правоў чалавека і перафарматаваць дзейнасць Рады Бяспекі ААН, якая, на думку палітыка, пераўтварылася ў фармальны орган і не можа выконваць сваіх функцыяў у поўным маштабе.
Прадстаўнікі ЗША ў Радзе Бяспекі адзначылі, што дамогуцца выключэння Расеі з Рады ААН у справе правоў чалавека. Чыноўнікі адзначаюць: апошнія падзеі вакол вайны ва Украіне яскрава дэманструюць, што ў Расеі няма ніякага шанавання годнасці чалавека, а Расея выкарыстоўвае Раду ААН для прапаганды. Таксама амерыканцы дадалі, што найбліжэйшым часам накіруюць 1 мільярд долараў гуманітарнай дапамогі Украіне.
Апроч таго, амерыканскі бок заявіў, што мае інфармацыю аб прымусовай дэпартацыі жыхароў усходу Украіны на тэрыторыю Расеі і стварэнні канцэнтрацыйных лагераў для цывільнага насельніцтва на акупаваных тэрыторыях.
ХЗ belsat.eu
