Польскія службы паведамілі пра спробу завезці з Беларусі партыю кантрабандных цыгарэтаў на $ 35 тысячаў. Больш за 10 тысячаў пачак былі схаваныя ў чыгуначных вагонах, у тым ліку ў цыстэрнах з сінтэтычнаю смалою.
Падатковая служба Польшчы знайшла ў двух цягніках з Беларусі больш за 10 тысячаў пачак цыгарэтаў. Яны былі схаваныя ў каркасах вагонаў-платформаў, а таксама ў цыстэрнах з вадкаю сінтэтычнаю смалою.
Кантрабанду заўважылі дзякуючы рэнтгенаўскім сканерам і пільнаму догляду. Партыю ацанілі на $ 35 тысячаў.
Нелегальны груз знайшлі на памежным пераходзе на Падляшшы.
Машыністаў абодвух цягнікоў дапыталі. Распачатае правяранне.
Збольшага беларускія кантрабандныя цыгарэты вязуць у Літву. Сёлета там затрымалі рэкордную партыю – на € 4 мільёны.
Сяргей Крот belsat.eu