Літоўскія мытнікі перахапілі адну з найбуйнейшых у гэтым годзе партыю беларускіх цыгарэт. Іх везлі маршрутам праз Расею – з Калінінградскай вобласці праз літоўскі пункт пропуску «Кібартай».
Раніцай 29 ліпеня грузавы аўтамабіль DAF на расейскіх нумарах пераязджаў расейска-літоўскую мяжу. Кіроўца, грамадзянін Расеі, заявіў, што вязе ва Уладзімір 18,6 тоны каўбасы «Доктарская». Аўтамабіль адправілі на рэнтген-кантроль, дзе высветлілася, што замест каўбасы ў ім перавозіліся беларускія цыгарэты.
«Калі паўпрычэп адчынілі, нават дасведчаныя мытнікі здзівіліся нахабству парушальнікаў: увесь паўпрычэп, аж да дзвярэй, быў набіты скрынямі кантрабандных цыгарэт. Іх было так шмат, што скрыні ледзь не вываліліся ў адчыненыя дзверы паўпрычэпа. Мытнікаў павесяліла і тое, што на адной са скрыняў была налепка з надпісам, што гэта каўбаса», – гаворыцца ў паведамленні літоўскага памежнага ведамства.
Усяго было канфіскавана 2000 скрыняў з цыгарэтамі, больш за 1 млн пачак. Кошт цыгарэт, разам з падаткамі, ацэньваецца на 4,12 млн еўраў, паведамляе мытня Літвы.
Пачатае дасудовае расследаванне. Кіроўцу арыштавалі на 15 содняў.
Гэта рэкордная колькасць цыгарэт, затрыманых на літоўскай мытні. Аналагічная партыя была перахопленая 17 сакавіка гэтага года. Тады на прапускным пункце «Райгардас» (на мяжы з Беларуссю) знайшлі каля 2000 скрыняў беларускіх цыгарэт, засыпаных торфам.
За першае паўгоддзе 2023 года літоўская мытня ўжо затрымала 6,46 млн пачак кантрабандных цыгарэт і 32 т тытуню (удвая менш, чым у мінулым годзе) – іх кошт перавышае 26 млн еўраў.
Алена Рувіна belsat.eu