Следчы камітэт у садзейнічанні з ГУБАЗ заявіў пра затрыманне двух менчукоў 43 і 36 гадоў, удзельнікаў закрытага чату, які з’яўляецца структурным падраздзяленнем ініцыятывы «Буслы ляцяць».
Па дадзеных следства, у красавіку гэтага года мужчыны кінулі камень у акно кватэры, дзе пражывае супрацоўнік пракуратуры Менску з малалетнім дзіцем. Пасля гэтага яны ўцяклі з месца здарэння. Паведамляецца, што мужчыны раней не судзімыя. Адзін з іх індывідуальны прадпрымальнік у сферы будаўніцтва, другі – інжынер.
Па інфармацыі Следчага камітэту, мужчыны ўступілі ў закрыты чат восенню 2020 года. Незадоўга да гэтага ў прызнаным экстрэмісцкім тэлеграм-канале былі апублікаваны адрас і кантактныя дадзеныя пракурора.
Супраць іх распачалі крымінальную справу па ч. 1 арт. 359 КК («Акт тэрарызму ў дачыненні да дзяржаўнага дзеяча») і ч. 2 арт. 290 КК («Удзел у арганізацыі, створанай для ажыццяўлення тэрарыстычнай дзейнасці»).
Цяпер затрыманыя знаходзяцца ў СІЗА, і па словах прадстаўніка Следчага камітэту актыўна супрацоўнічаюць са следствам і гатовы пакрыць шкоду.
АД, belsat.eu
