З заявай пра беларускую атлетку выступіў лідар найбуйнейшай партыі Еўразвязу, рэпрэзентаванай ва ўсіх структурах альянсу.
Генеральны сакратар Еўрапейскай народнай партыі Антоньё Лопэс-Істурыс Ўайт 3 жніўня апублікаваў у Twitter наступную заяву адносна сітуацыі вакол Крысціны Ціманоўскай:
«Беларускі рэжым цісне на беларускую атлетку Алімпіяды ў Токіа Крысціну Ціманоўскую, пагражаючы ейным бацькам. Пагрозы беларусцы, якую пераследуе рэжым, не мусяць мець месца. Гэтае злачынства супраць Алімпіяды вымагае неадкладнага міжнароднага адказу».
Абноўлена: Бацькі Ціманоўскай у размове з «Еўрарадыё» сказалі, што іх сям’ёй сілавікі не цікавіліся наўпрост.
Крысціна Ціманоўская мелася выступіць на Алімпіядзе 2 жніўня ў папярэднім забегу на дыстанцыі 200 метраў, аднак НАК Беларусі адхіліў яе ад удзелу ў Алімпіядзе і прыняў рашэнне адправіць Ціманоўскую дадому ў сувязі «з яе эмацыйна-псіхалагічным станам». Спартовы арбітражны суд адмовіўся скасаваць адхіленне атлеткі ад гульняў.
1 жніўня Ціманоўская ў такійскім аэрапорце звярнулася ў паліцыю і запісала відэа, у якім прасіла дапамогі, бо казала, што на яе ціснуць і спрабуюць вывезці без ейнай згоды. Паліцыя суправадзіла дзяўчыну ў гатэль, на наступны дзень Польшча дала ёй гуманітарную візу.
Да таго Ціманоўская апублікавала відэа, у якім расказвала, што яе, не спытаўшы, выставілі на спаборніцтвы, да якіх яна не рыхтавалася: на эстафету «4 па 400». Яна раскрытыкавала спартовых чыноўнікаў Беларусі за тое, што лёгкаатлетак, якія мусілі бегчы гэтую эстафету, не дапусцілі да Алімпіяды праз недастатковую колькасць допінг-пробаў. Чыноўнікі пагражалі ёй за гэтае відэа.
АА belsat.eu