Вынесеныя прысуды ў справе «Nexta»: Пратасевіч – 8 гадоў, Рудзік – 19, Пуціла – 20
У Менску вынеслі прысуды чальцам рэдакцыі тэлеграм-каналу «Nexta». Пратасевіч атрымаў 8 гадоў, Рудзік і Пуціла адпаведна 19 і 20. Пра гэта паведамляе БелТА.
3 траўня ў Менскім абласным судзе прагучалі прысуды ў справе чальцоў рэдакцыі звышпапулярнага падчас пратэстаў 2020 года тэлеграм-каналу «Nexta» Рамана Пратасевіча, Яна Рудзіка і Сцяпана Пуцілы. Іх абвінавацілі ў змове з мэтай захопу дзяржаўнай улады неканстытуцыйным шляхам.
Паводле абвінавачання, фігуранты справы ў розны час з 2020 года, будучыы пераважна ў Польшчы, «выконваючы агульны план змовы з мэтай захопу дзяржаўнай улады ў Беларусі неканстытуцыйным шляхам, рэалізуючы ролі і задачы ўстойлівай групы, якую яны ўзначальваюць, публікавалі ў сетках каналаў «Nexta» і «Беларусь галаўнога мозгу» інфармацыйныя матэрыялы, якія маюць дэструктыўныя мэты. Акрамя таго, абвінавачаныя заклікалі пратэстава настроеных грамадзянаў здзяйсняць акты тэрарызму».
У выніку чальцы рэдакцыі прызнаныя вінаватымі ў «публічных закліках да захопу дзяржаўнай улады, актаў тэрарызму, абразе прэзідэнта, распаўсюджванні заведама ілжывых звестак аб Беларусі і іншых злачынствах». Пратасевіч атрымаў 8 гадоў, Рудзік і Пуціла – адпаведна 19 і 20.
Суд над Сцяпанам Пуцілам і Янам Рудзікам праходзіў завочна, Раман Пратасевіч быў у зале на лаўцы, не ў клетцы. Пазней стала вядома, што Пратасевіча не ўзялі пад варту ў зале суда, і пасля агалошвання прысуду суд пакінуў яму ранейшую меру стрымання — хатні арышт. Паводле звестак праваабаронцаў, пазоў аб пакрыцці маёмаснай шкоды на агульную суму больш за Br 30 млн разгледзяць у парадку грамадзянскай судовай вытворчасці.
Раней паведамлялася, што пракурорка запатрабавала даць Пратасевічу 10 гадоў пазбаўлення волі, а Рудзіку і Пуцілу завочныя 19 і 20 гадоў зняволення. Раней дзяржаўныя медыі паведамлялі, што Пратасевіч часткова прызнаў новае абвінавачанне.
Праваабарончая супольнасць прызнала Пратасевіча палітычным зняволеным. Статус не скасоўвалі, нягледзячы на заявы ўладаў аб пераводзе пад хатні арышт і вызваленне з-пад яго, а таксама нягледзячы на «пакаянныя» заявы зняволенага.
Мірон Маліна belsat.eu
