Сярод законапраектаў, якія прэзідэнт Літвы Гітанас Наўседа ўнёс у Сейм на восеньскую сесію, няма паправак, якія датычаць уніфікацыі абмежаванняў для грамадзянаў Беларусі і Расеі, піша LRT.
Восеньская сесія літоўскага Сейму распачынаецца 10 верасня. Наўседа вынес на разгляд парламентарыяў законапраекты, звязаныя з падатковымі льготамі для бацькоў, якія працуюць, магчымасцю вярнуць частку пенсійных сродкаў, якія акумулююцца ў прыватных фондах, падвышэннем заробку пракурораў. Паправак аб аднолькавых абмежаванняў дла расейцаў і беларусаў сярод прапановаў няма.
Яшчэ ўвесну бягучага года прэзідэнт Літвы наклаў вета на закон, які прадугледжваў розныя абмежаванні для расейцаў і беларусаў, маўляў, усе абмежавальныя захады ў дачыненні да грамадзянаў Расеі і Беларусі мусяць быць аднольнкавымі. Аднак Сейм пераадолеў вета Наўседы. Пазней, пасля таго, як у Беларусі з’явіліся найміты ПВК Вагнэра, некаторыя літоўскія палітыкі заявілі, што ўзнікла неабходнасць вярнуцца да законапраекту аб увядзенні для беларусаў такіх жа абмежаванняў, як і для расейцаў. Чакалася, што пытанне будзе зноў разглядацца на восеньскай сесіі Сейму.
Старэйшы дарадца Святланы Ціханоўскай Франак Вячорка ўхваліў рашэнне Наўседы не ўносіць папраўкі.
«Тое, што прэзідэнт Наўседа не стаў уносіць у парламент папраўкі, якія прадугледжваюць ураўноўванне абмежаванняў супраць беларусаў і расейцаў – гэта добры знак. Нашую пазіцыю пачулі. Нельга ўраўноўваць беларусаў і расейцаў, гэтаксама як і беларусаў і рэжым, – кажа Вячорка. – За апошнія тыдні мы правялі вялікую колькасць сустрэчаў і размоваў з літоўскімі палітыкамі, і здаецца, былі пачутыя».
Офіс Святланы Ціханоўскай працягвае камунікацыю з урадам і парламентам Літвы ў пошуках вырашэння сітуацыі, якое б «не біла па беларусах, якія не нясуць адказнасці за злачынствы рэжыму». На бліжэйшыя дні запланаваныя сустрэчы Святланы Ціханоўскай з міністаркай унутраных справаў, прэм’еркай і дэпутатамі літоўскага Сейму.
Марыя Міхалевіч belsat.eu