Пасля таго, як Літва закрыла пункты пропуску «Лаворышкес – Катлоўка» і «Райгардас – Прывалка», на тых, што засталіся – у Каменным Логу і Беняконях значна вырасла колькасць фураў у чэргах, паведамляе Беларускі памежны камітэт.
Рост чэргаў грузавога транспарту на выезд з Беларусі ў Літву вырас на 57% у параўнанні з паказнікамі тыднёвай даўнасці. Таксама беларускія памежнікі сцвярджаюць, што рашэнне Літвы аб закрыцці чарговых двух памежных пераходаў стварыла перашкоды для саміх літоўцаў, якія хацелі скарыстацца беларускім бязвізам. Паводле Памежнага камітэту, ад пачатку дзеяння бязвізавага рэжыму Беларусь наведалі каля 520 тысяч літоўцаў.
Па стане на вечар 2 сакавіка, паводле інфармацыі на сайце Памежнага камітэту, у Каменным логу ў чарзе стаяць 30 легкавых аўтамабіляў і 700 цяжкавікоў, у Беняконях – 670 цяжкавікоў, чаргі з легкавых няма.
Уначы 1 сакавіка Літва закрыла пункты пропуску на мяжы з Беларуссю: «Райгардас – Прывалка» і «Лаворышкес – Катлоўка». На думку міністаркі ўнутраных справаў Агне Білатайце, гэтае закрыццё своечасовае і неабходнае, бо суседнія дзяржавы маюць па адным КПП, у той час як Літва – ажно чатыры, што прывяло да павелічэння праз іх патоку тавараў, транспарту і людзей.
18 жніўня 2023 года Літва закрыла першыя два з шасці пунктаў пропуску на мяжы з Беларуссю – «Шумскас» («Лоша» з беларускага боку) і «Твярачус» («Відзы»). У выніку гэтага колькасць літоўцаў, якія ездзяць у Беларусь, скарацілася на 37 %, а вось паток беларусаў у Літву застаўся амаль на тым жа ўзроўні.
Засталіся два дзейныя пераходы – «Мядзінінкай – Каменны Лог» і «Шальчынінкай – Беняконі». Праз іх з 1 сакавіка мяжу нельга перайсці пешшу і на ровары.
Марыя Міхалевіч belsat.eu
