Уначы 1 сакавіка Літва закрыла чарговыя пункты пропуску на мяжы з Беларуссю: «Райгардас – Прывалка» і «Лаворышкес – Катлоўка». Засталіся два дзейныя пераходы – «Мядзінінкай – Каменны Лог» і «Шальчынінкай – Беняконі».
Як адбывалася закрыццё пераходаў, распавяла «Гарадзенская праўда». Апоўначы ў пункце «Райгардас» на дарозе былі ўсталяваныя агароджы. На мяжы ў гэты момант былі транспартныя сродкі – паводле гарадзенскага выдання, памежнікі прапусцілі адзін аўтамабіль на літоўскіх нумарах, а астатнім загадалі разварочвацца. У тым ліку не прапусцілі пасажырскі аўтобус.
Закрыць чарговыя памежныя пункты на мяжы з Беларуссю літоўскі ўрад пастанавіў 21 лютага. З 1 сакавіка на мяжы Літвы і Беларусі засталіся два прапускныя пункты – «Мядзінінкай – Каменны Лог» і «Шальчынінкай – Беняконі». Праз іх з 1 сакавіка мяжу нельга перайсці пешшу і на ровары. Станам на раніцу 1 сакавіка ў гэтых двух пунктах сабраліся чэргі на выезд з Беларусі: 200 легкавых аўтамабіляў і 1175 цяжкавікоў.
Таксама Літва забараніла пасадку і высадку пасажыраў на памежнай чыгуначнай станцыі «Кеда». Таксама надоечы была зменшаная колькасць дазволаў на пасажырскія перавозкі паміж Літвой і Беларуссю як беларускімі, так і літоўскімі перавознікамі.
На думку міністаркі ўнутраных справаў Агне Білатайце, закрыццё яшчэ двух памежных пунктаў своечасовае і неабходнае, бо суседнія дзяржавы маюць па адным КПП, у той час як Літва – ажно чатыры, што прывяло да павелічэння праз іх патоку тавараў, транспарту і людзей.
18 жніўня 2023 года Літва закрыла першыя два з шасці пунктаў пропуску на мяжы з Беларуссю – «Шумскас» («Лоша» з беларускага боку) і «Твярачус» («Відзы»). У выніку гэтага колькасць літоўцаў, якія ездзяць у Беларусь, скарацілася на 37 %, а вось паток беларусаў у Літву застаўся амаль на тым жа ўзроўні.
Марыя Міхалевіч belsat.eu
