У МЗС Расеі патлумачылі, за які дыялог улады і апазіцыі ў Беларусі выступае Пуцін
Намеснік міністра замежных спраў Расеі Андрэй Рудэнка ў інтэрв’ю ТАСС выказаўся наконт канстытуцыйнай рэформы ў Беларусі і патлумачыў, як мусіць выглядаць дыялог улады і апазіцыі з пункту гледжання Уладзіміра Пуціна.
Па словах Рудэнкі, Масква паслядоўна выступае «супраць заходняга ўмяшання ва ўнутраныя справы Беларусі і навязвання ёй нейкага міжнароднага пасярэдніцтва».
«Перакананы, што толькі беларускі народ і яго легітымныя прадстаўнікі, а не самазваныя «лідары дэмакратычных сілаў» і іх заходнія куратары маюць права вызначаць лёс сваёй краіны. Любыя грамадскія супярэчнасці павінны вырашацца выключна ў рамках канстытуцыйнага поля шляхам канструктыўнага грамадскага дыялогу.
Перакананы, што Уладзімір Уладзіміравіч Пуцін выступаў на карысць менавіта такога дыялогу – з грамадзянамі, якія рэальна зацікаўленыя ў мадэрнізацыі палітычнага ладу і стабільным развіцці сваёй краіны, а не заклікаюць з-за мяжы да санкцыяў супраць яе эканомікі і сваіх суайчыннікаў, якія размаўляюць выключна на мове лозунгаў і ўльтыматумаў», – заявіў намеснік кіраўніка МЗС РФ.
Рудэнка станоўча ацаніў дзеянні рэжыму Лукашэнкі адносна канстытуцыйнай рэформы і назваў «правакацыйнымі» заклікі палітэмігрантаў байкатаваць рэферэндум ці псаваць бюлетэні. Але пры гэтым ён дадаў, што «Расея прыме любы вынік рэферэндуму».
Нагадаем, 18 лістапада 2020 года Уладзімір Пуцін, выступаючы на пашыраным паседжанні калегіі МЗС, заявіў:
«Так, мы ведаем, што сітуацыя ў Беларусі супакоілася ўнутры краіны, але тым не менш праблемы ёсць, і мы цудоўна разумеем гэта. І, вядома, заклікаем да дыялогу паміж уладамі ды апазіцыяй».
РР belsat.eu
