Кітайскія ўлады выпусцілі мапы, на якіх пазначылі частку тэрыторыяў Індыі і Расеі як сваю. МЗС Індыі выступілі з асуджэннем гэтага, а ў расейскім ведамстве толькі адзначылі, што тэрытарыяльных спрэчак паміж краінамі няма, піша РБК.
Кітайскі дзяржаўны Картаграфічны сэрвіс стандартных мапаў выпусціў новы, афіцыйна зацверджаны камплект геаграфічных мапаў за 2023 год, на якіх частка тэрыторый Расеі – Вялікі Усурыйскі востраў – адносіцца да Кітаю. Гэты камплект мапаў прызначаны для выкарыстання ў якасці ілюстрацыяў у навінах, кнігах, рэкламных матэрыялах.
Вялікі Усурыйскі востраў на рацэ Амур мае тэрыторыю 327–350 км2 (залежыць ад узроўню вады ў рацэ). Спрэчка за кантроль над ім ішла паміж Расеяй і Кітаем з 1860 года. У 2008 годзе частку вострава разам з некалькімі невялікімі астравамі РФ перадала Кітаю.
Таксама Картаграфічны сэрвіс стандартных мапаў аднёс да КНР індыйскі штат Аруначаль-Прадэш і прымежны раён Аксайчын.
«Сёння мы праз дыпламатычныя каналы выказалі рашучы пратэст кітайскаму боку наконт так званай стандартнай мапы Кітаю 2023 года, якая прэтэндуе на тэрыторыю Індыі», – заявілі ў індыйскім МЗС.
А вось афіцыйная прадстаўніца МЗС Расеі Марыя Захарава проста адзначыла, што памежнае пытанне паміж Расеяй і Кітаем канчаткова вырашанае, гэтай пазіцыі прытрымваюцца абедзве краіны.
«Дэлімітацыя і дэмаркацыя нашай агульнай мяжы завершаная на ўсёй яе працягласці (амаль 4300 км), у тым ліку ў 2008 годзе на востраве Вялікі Усурыйскі», – сказала яна.
Паводле неафіцыйных кітайскіх мапаў увесь Далёкі Усход РФ – гэта тэрыторыя КНР, а ў афіцыйных падручніках гісторыі ў Кітаі сцвярджаецца, што «Сібір – часова страчаная тэрыторыя Паднябеснай», заяўляюць расейскія медыі.
Якуб Хруст belsat.eu