Расея не будзе падпісваць мірнай дамовы з Украінаю, пакуль на чале дзяржавы застаецца Уладзімір Зяленскі. Такое патрабаванне, паводле вайсковага эксперта Ніка Лянге, Крэмль выстаўляе на фоне няпэўнасці з боку ЗША і ЕЗ.
23 траўня заяву, што, «калі дойдзе да падпісання, пытанне легітымнасці будзе мець вырашальнае значэнне», зрабіў міністр замежных справаў РФ Сяргей Лаўроў.
Паводле яго, Расея гатовая весці кантакты з украінскім кіраўніцтвам дзеля ўзгаднення прынцыпаў урэгулявання, але канчатковую дамову мусяць падпісваць асобы, чыё становішча не выклікае сумневаў.
Лаўроў адзначыў: калі падпішуць «тыя, чыя легітымнасць ужо не пераконвае, то зменшчыкі могуць паставіць пад сумнеў дасягнутую дамоўленасць».
Як падкрэслівае выданне «BildI», заява Лаўрова фактычна азначае: пакуль дзеіць урад Зяленскага, ніякай мірнай дамовы з боку Расеі чакаць не варта. Пры гэтым у Крамлі зноў прагучалі заклікі да «змены ўлады» ў Кіеве, што ў Маскве называюць «дэнацыфікацыяй».
Выданне спасылаецца на нямецкага вайсковага эксперта Ніка Лянге, які звязвае такую рыторыку з няпэўнасцю Захаду: на платформе X ён заявіў, што слабая і няпэўная пазіцыя ЗША і Еўропы толькі заахвочвае Расею вылучаць усё больш жорсткія патрабаванні. Пры гэтым, як адзначае «Bild», нават лідар CDU Фрыдрых Мэрц, які нядаўна абяцаў падтрымліваць Украіну ў выпадку расейскага наступу, пасля заяваў Доналда Трампа не выступіў з канкрэтнымі ініцыятывамі дапамогі.
Сапраўды, нямецкі канцлер папярэджваў Трампа пра намеры ўвесці супраць Расеі магутныя санкцыі, але пакуль гэтыя заявы так і засталіся на словах.
Трамп паведаміў еўрапейскім лідарам, што Уладзімір Пуцін цяпер не гатовы спыніць вайны, бо мяркуе, што перамагае.
Спасылаючыся на Ніка Лянге, «Bild» адзначае, што ў Пуціна «ніколі не было мэты заключыць замірэння», бо ён «выкарыстоўвае абмеркаванне, каб стварыць ваенныя факты». Лянге адзначае: яшчэ нават падчас мірных перамоваў з Трампам Пуцін меў у планах новы наступ, які быў запланаваны на чэрвень і цяпер пачынаецца.
,,«Расея спрабуе прасунуцца ў Сумскую, Харкаўскую і Днепрапятроўскую вобласці, каб, акрамя фармальна анексаваных рэгіёнаў, стварыць новыя праблемы для перамоваў», – прыводзіць выданне словы Ніка Лянге.
У сваю чаргу ўкраінскія вайскоўцы пацвярджаюць словы эксперта, адзначаючы вялікі збор асабовага складу расейскіх войскаў на мяжы з Украінаю, што ёсць ясным сігналам пра рыхтаванне нападаў.
Раман Шавель belsat.eu
