На другі дзень свайго афіцыйнага візіту ў Беларусь генеральны сакратар ЦК Кампартыі В'етнаму То Лам завітаў у Палац Незалежнасці. Сустракалі госця традыцыйна – маршам вайскоўцаў і гукамі аркестру.
Гэта ўжо чацвёрты візіт То Лама ў Беларусь, аднак першы пасля ягонага абрання летась кіраўніком Камуністычнай партыі В'етнаму. Падчас перамоваў афіцыйны Менск і Ханой дамовіліся, сярод іншага, актывізаваць сувязі ў абароне. Размова вядзецца ў тым ліку пра рыхтаванне кадраў, вайсковую медыцыну.
Аднак галоўнаю задачаю двухбаковай супрацы Лукашэнка назваў актывізацыю ў эканоміцы.
Цяперашнюю эканамічную супрацу паміж дзвюма краінамі цяжка ацаніць. Паводле афіцыйнага Менску, летась таваразварот Беларусі і Вʼетнаму склаў больш за 240 млн долараў. У Ханоі ж налічылі толькі 60 млн. І амаль 24 млн долараў таваразвароту за першыя чатыры месяцы 2025-га. Але ці здолее Вʼетнам у перспектыве зрабіцца выгадным эканамічным партнёрам для нашай краіны?
«У Беларусі была пабудаваная такая эканамічная мадэль, што якога вонкавага партнёра ні бяры эканамічнага, выгады ад супрацы будзе мала. Бо ў першую чаргу трэба пачынаць са змены эканамічнай мадэлі, што будзе навостраная не на кантроль з боку дзяржавы, абмежаванне, а потым адбіранне прыбытку. А на свабоднае развіццё, свабодны рынак», – кажа кандыдат гістарычных навук Яўген Красулін.
Вынікам перамоваў у Менску сталася падпісанне пакету дакументаў аб супрацы ў розных сферах. Таксама Лукашэнка абвясціў і ўсталяванне стратэгічнага партнёрства паміж Беларуссю і В'етнамам.
«В'етнам – гэта ўсё ж такі краіна, якая мае пэўны аўтарытэт на міжнароднай арэне. Вельмі істотная роля В'етнаму ў такой арганізацыі, як АСЕАН. І, канешне, казаць, што мы іх стратэгічныя партнёры выгадна з гледзішча прамоўшану і піяру», – кажа Яўген Красулін.
Аднак То Лам вернецца ў Ханой не толькі як кіраўнік дзяржавы – стратэгічнага партнёра Беларусі. Лукашэнка ўручыў яму ордэн Дружбы народаў – найвышэйшую ўзнагароду ў Беларусі для замежных грамадзянаў.
Цяпер у Беларусі з афіцыйным візітам яшчэ адзін кіраўнік прыязнай афіцыйнаму Менску краіны. Прэзідэнт Зімбабвэ Эмэрсан Мнангагўа правядзе перамовы з Лукашэнкам 14 траўня. Пакуль жа лідара гэтай афрыканскай рэспублікі сустракалі ў Берасці, дзе ён, сярод іншага, наведаў прадпрыемства «Савушкін прадукт».
Ірына Юрʼева belsat.eu
