Жыхары Пінску скардзяцца на неверагодную колькасць кляшчоў на невялікай плошчы, піша «Медиа-Полесье» са спасылкай на відэа з сацсетак.
Усе лічынкі выжылі
Паводле спецыялістаў, рост колькасць кляшчоў звязаны з цёплымі зімамі. Рэч у тым, што праз высокую тэмпературу ўзімку папуляцыя кляшчоў не скарацілася натуральным чынам шляхам прамярзання, усе лічынкі выжылі і здолелі прайсці патрэбныя стадыі развіцця, і цяпер яны могуць атакаваць жывёлінаў і чалавека.
Берасцейская вобласць – сярод рэгіёнаў, дзе кляшчоў асабліва шмат.
Небяспека кляшчоў у тым, што яны пераносяць цяжкія хваробы. Штогод у Беларусі рэгіструецца больш за 2000 выпадкаў хваробы Лайма і больш як 200 выпадкаў кляшчовага энцэфаліту.
У Беларусі зарэгістравана больш за 10 відаў кляшчоў, якія могуць пераносіць дзевяць узбуджальнікаў інфекцыяў наступных хваробаў: кляшчовы энцэфаліт, Лайм-барэліёз, анаплазмоз, эрліхіёз, Ку-ліхаманка, рыкетсіёз і іншых. Пры гэтым штогод на тэрыторыі Беларусі з кляшчовых інфекцыяў рэгіструюць толькі Лайм-барэліёз і кляшчовы вірусны энцэфаліт.
Агулам у свеце існуе больш за 50 000 відаў кляшчоў. На шчасце, небяспечныя толькі іксодавыя (іх адрознівае характэрны шчыток на спінцы). Яны паразітуюць на свойскай, дзікай жывёле, чалавеку і сілкуюцца крывёй «гаспадара».
5 простых правілаў абароны ад кляшчоў:
1. Правільнае адзенне і абутак: насіце высокі абутак, адзенне з доўгімі рукавамі і нагавіцы, запраўленыя ў шкарпэткі. Светлая тканіна без узораў дапаможа хутчэй заўважыць кляшча.
2. Галаўны ўбор: кепка, шапка або хустка закрыюць галаву і шыю.
3. Ахоўныя сродкі: выкарыстоўвайце акарыцыдныя прэпараты, апрацоўвайце імі вопратку і адкрытыя ўчасткі скуры.
4. Асцярожнасць на прыродзе: не сядзіце на траве без посцілкі, пазбягайце хмызняку і высокай расліннасці.
5. Рэгулярны агляд: правярайце сябе і спадарожнікаў кожныя 30–40 хвілінаў. Клешч можа паўзці па вопратцы каля гадзіны, перш як прысмактацца. Удома таксама агледзьце адзенне і цела, найлепш – страсяніце адзежу над ваннай.
Марыя Міхалевіч belsat.eu
