Прэзідэнт Украіны Уладзімір Зяленскі ўжо пакінуў Белы дом, а яго сумесная прэс-канферэнцыя з прэзідэнтам ЗША Доналдам Трампам скасаваная, піша «Reuters» са спасылкай на прадстаўніка Белага дому.
Гэта адбылося пасля сваркі Уладзіміра Зяленскага з Доналдам Трампам, які абвінаваціў прэзідэнта Украіны ў няўдзячнасці.
Паводле CNN, Зяленскі паехаў праз некалькі хвілін пасля спрэчкі, а ўгода па карысных выкапнях не была падпісаная. «FoxNews» сцвярджае, што Трамп «выгнаў» Зяленскага.
Пазней Трамп апублікаваў у сваёй сацсетцы пост, у якім працягнуў крытыкаваць Зяленскага:
«Сёння ў нас была вельмі змястоўная сустрэча ў Белым доме. Мы даведаліся шмат новага, што немагчыма зразумець без размовы пад такім агнём і ціскам. Дзіўна, што высвятляецца на эмоцыях, і я зразумеў, што прэзідэнт Зяленскі не гатовы да міру, калі ў ім будзе ўдзельнічаць Амерыка, таму што ён адчувае, што наш удзел дае яму вялікую перавагу ў перамовах. Мне не патрэбныя перавагі, мне патрэбен мір. Ён праявіў непавагу да Злучаных Штатаў Амерыкі ў іх запаветным Авальным кабінеце. Ён можа вярнуцца, калі будзе гатовы да міру».
Шкада, што Зяленскі не мой прэзідэнт
Амерыканскі юрыст Ігар Слабых распавёў «Белсату», што ўспомніць настолькі вострую спрэчку ў Авальным кабінеце не можа. На яго думку, тое, што адбылося, было не вельмі паважліва з абодвух бакоў. Аднак праблема ў тым, што ад любога, хто прыйдзе ў авальны кабінет не чакаюць такога адпору, таму паводзіны Зяленскага могуць здавацца непаважлівымі для амерыканскага боку, адзначае суразмоўца.
«Пры гэтым я рэальна вельмі шкадую як грамадзянін Расеі, які жыве ў Амерыцы, што я не магу сказаць, што Зяленскі – мой прэзідэнт. Таму што настолькі годна, правільна, непахісна паводзіць сябе перад прэзідэнтам ЗША, мне здаецца, трэба сапраўды валодаць вельмі вялікай мужнасцю. Мне здаецца, што Зяленскі справіўся з гэтай задачай, каб паказаць Трампу сваю нязломнасць», – кажа Ігар Слабых. – І яму на гэта наракаў Джэй Дзі Вэнс [віцэ-прэзідэнт ЗША], які казаў, што вось вы няправільна робіце, трэба быць удзячнымі і гэтак далей».
На думку юрыста, Трамп паводзіць сябе агрэсіўна, таму што ў яго не выходзіць заключыць угоду, хоць ён выхваляўся, што зможа зрабіць гэта вельмі хутка.
,,«Трамп вёў перадвыбарчую кампанію пад дэвізам "я спыню вайну за 24 гадзіны яшчэ да таго, як стану прэзідэнтам". Потым пачалі з'яўляцца там 100 дзён, потым 180 дзён, яшчэ нейкія тэрміны. Угода не зрастаецца, таму ён прэсуе Зяленскага. Гэта спроба прымусіць Зяленскага пагадзіцца на ўгоду незалежна ад яе ўмоў», – адзначае суразмоўца.
Што з гэтай нагоды думаюць амерыканцы, складана сказаць. Па назіраннях Слабых, у іх няма адзінства ў адносінах да Украіны.
«Ёсць тыя, хто падтрымлівае Украіну і лічыць, што Амерыка павінна дапамагаць. Ёсць тыя, хто наадварот лічыць, што там Амерыка не павінна дапамагаць Украіне, хай Еўропа сама займаецца сваімі праблемамі, мы павінны марнаваць грошы не на Украіну, а на амерыканскія праблемы. Ёсць дастаткова вялікая доля тых, хто наогул лічаць, што іх гэта не тычыцца», – кажа ён.
Ігар Слабых мяркуе, што пасля ўсіх крокаў Трампа для Украіны горш ужо быць не можа, таму падтрымлівае стратэгію Зяленскага.
«Трамп здаў Украіну. Ён любіць казаць, што ён такі дылмэйкер, прафесіянал, кніжку напісаў пра гэта. І ў гэтай кніжцы ён кажа, што трэба пачынаць здзелку з максімумаў, каб потым гандлявацца. А цяпер нават не пачаўшы гандлявацца з Пуціным, ён ужо сказаў, што Украіна не будзе ў NATO, амерыканскіх вайскоўцаў не будзе на тэрыторыі Украіны, паставак узбраенняў ва Украіну не будзе.
Напэўна, горш можа быць, калі ЗША далучацца да Расеі, каб выбіць Узброеныя Сілы Украіны з Курскай вобласці. Таму мне здаецца, што стратэгія Зяленскага абсалютна правільная – гэта казаць жорстка казаць, выразна і тлумачыць, што вы не можаце разлічваць на нейкія добрасумленныя дзеянні з боку Пуціна, які ўжо неаднаразова парушаў сваё слова і хлусіў», – заключае Ігар Слабых.
Арсен Рудэнка belsat.eu
