Прэзідэнт Украіны Уладзімір Зяленскі і прэзідэнт ЗША Доналд Трамп пачалі спрачацца перад журналістамі падчас гутаркі ў Белым доме.
У пачатку размовы Доналд Трамп сказаў, што размаўляў з Уладзімірам Пуціным пару дзён таму і нібыта той хоча дамовіцца, паведамляе «Reuters». Трамп дадаў, што ў перамовах знаходзіцца паміж Украінай і Расеяй.
Уладзімір Зяленскі паказаў Трампу фатаграфіі ўкраінскіх байцоў, якія вярнуліся з расейскага палону.
«Нават на вайне ёсць правілы... У гэтых хлопцаў няма правілаў», – сказаў Зяленскі пра Расею.
Ён адзначыў, што Уладзімір Пуцін пачаў вайну, таму ён павінен плаціць, і нагадаў пра $ 300 млрд расейскіх актываў, якія замарожаныя на Захадзе. Зяленскі сказаў, што Украіна мае патрэбу ў амерыканскіх сродках супрацьпаветранай абароны.
Затым Трамп сказаў, што многія з украінскіх гарадоў разбураныя. Зяленскі адзначыў, што ёсць і гарады, у якіх жывуць людзі, а дзеці ходзяць у школу.
Зяленскі падкрэсліў, што Пуціну нельга верыць, бо ён парушаў угоды аб спыненні агню.
Тады да размовы падключыўся віцэ-прэзідэнт Джэй Дзі Вэнс і сказаў, што з боку Зяленскага непаважліва прыходзіць у Авальны кабінет, каб адстойваць сваю пазіцыю. Ён згадаў пра праблемы Украіны. Зяленскі адказаў, што Вэнс не быў ва Украіне.
Ён дадаў, што праз вайну ўва ўсіх праблемы, хоць ЗША і за акіянам, але гэта ўсё адно адчуваецца. Трамп зрабіў заўвагу Зяленскаму і заклікаў яго быць удзячным.
«Не навязвайце нам, што мы будзем адчуваць, мы спрабуем развязаць вашую праблему», – сказаў Трамп.
Размова перайшла на павышаныя тоны.
«Людзі паміраюць... у вас не хапае жаўнераў, – сказаў Трамп Зяленскаму. – Вы рызыкуеце трэцяй сусветнай вайной».
Трамп таксама сказаў Зяленскаму: «У вас на руках няма моцных картаў». Ён заявіў, што Украіна атрымала ад ЗША дапамогі на $ 350 млрд і, калі б не амерыканская зброя і тэхніка, вайна б скончылася за два тыдні.
«Я чуў ад Пуціна, што гэта тры дні», – адказаў Зяленскі.
Пасля выхаду журналістаў з кабінету пачалася сустрэча прэзідэнтаў за зачыненымі дзвярыма.
Арсен Рудэнка belsat.eu
