Аляксандр Лукашэнка 27 лютага ў інтэрв’ю амерыканскаму блогеру Мар'ё Нофалу апавёў, калі сустрэнецца з Уладзімірам Пуціным і што будзе з ім абмяркоўваць.
Мар'ё Нофал запытаўся ў Лукашэнкі, ці размаўляў ён з Пуціным пра ўгоду Украіны і ЗША наконт рэдказямельных металаў, а таксама пра ўражанні Пуціна ад размовы з Трампам. Лукашэнка адказаў, што гэтыя тэмы падымаліся «толькі ў агульных рысах»:
,,«І пра размову з Трампам, і пра перамовы ў Саудаўскай Аравіі, і пра рэдказямельныя матэрыялы. Бо праз тыдзень мы з ім сустрэнемся ў Маскве ды вельмі падрабязна і дэталёва пагутарым наконт усіх пытанняў. Праз тэлефон мы на гэта і спаслаліся, што мы сустрэнемся і абмяркуем усе пытанні ў дэталях».
Лукашэнка заявіў, што сам падняў пытанне пра рэдказямельныя металы ў размове з Пуціным:
«Я пытанне падняў, кажу: дзіўна неяк – амерыканцы патрабуюць ад Украіны аддаць ім важнейшае, што ў іх ёсць. Гаворка ж не толькі пра рэдказямельныя матэрыялы, але і пра прыродны газ, нафту, пра лагістыку (парты) і г.д. Тут жа больш шырокае пытанне. І я Пуціну выклаў сваю пазіцыю вось у такім ключы. На што ён сказаў, што «амерыканцы ломяцца ў адкрытыя дзверы, гэта ёсць усё ў Расеі, мы можам з імі дамовіцца і працаваць. А потым публічна гэта агучыў».
Блогер запытаўся, ці можа Расея разглядаць здзелку паміж Украінай і ЗША па распрацоўцы рэдказямельных металаў як пагрозу. Лукашэнка адказаў, што лічыць, што пагадненне паміж ЗША і Украінай можа насцярожваць Расею, і Маскве можа быць непрыемна, што ЗША распрацоўваюць карысныя выкапні ў суседняй краіне, у той час як Расея магла б сама займацца гэтым.
,,«Гэта можа насцярожваць Расею і, хутчэй за ўсё, насцярожвае. <…> калі Расея адчуе, што гэтыя дамоўленасці будуць выходзіць за межы эканамічных стасункаў. Калі гэта будзе чыстая эканоміка, не звязаная з вайскова-прамысловым комплексам, зброяй, узброенымі сіламі, чаму б і не. Расея будзе спакойна працаваць. Так, непрыемна, што магутная дзяржава ў выглядзе Злучаных Штатаў Амерыкі ў цябе за вакном будзе распрацоўваць карысныя выкапні, ствараць свае прадпрыемствы і гэтак далей. Напэўна, не вельмі прыемна. Гэта мог бы рабіць ты, але робяць іншыя. Але гэта Расея перажыве. Расея вялізная, і ў яе гэтага дабра хапае», – сказаў палітык.
Што да перамоваў аб Украіне, то, са словаў Лукашэнкі, Пуцін гатовы да іх:
«Пуцін кажа, украінцы і Зяленскі крыўдзяцца, што іх не паклікалі ў Саудаўскую Аравію. Але навошта клікаць, калі там былі пытанні Расеі і ЗША? Там толькі мімаходзь закранулі пытанні Украіны. Таму навошта было клікаць Украіну? Але пра гэта і Трамп ужо сказаў. Калі будуць развязвацца пытанні Украіны, я думаю, без Украіны ніхто гэтыя пытанні развязваць не будзе».
Лукашэнка таксама выказаўся пра магчымае ўвядзенне еўрапейскіх міратворчых сілаў ва Украіну:
«Расея ніколі з гэтым на пагодзіцца. Прынамсі такая пазіцыя Расеі на сёння. Пагатоў кіраўніцтва ЕЗ, найперш у асобах Нямеччыны і Францыі займаюць вельмі агрэсіўную пазіцыю на гэты момант у дачыненні вайны Расеі і Украіны. Таму Расея катэгарычна супраць любых міратворчых сілаў з боку еўрапейскіх дзяржаваў».
Мар'ё Нофал нарадзіўся ў Ліване, мае аўстралійскае грамадзянства і дазвол на жыхарства ў ААЭ. Вядомы як амерыканскі крыптапрадпрымальнік, блогер, аўтар праекту «Круглы стол» у Х, у межах якога робіць відэаінтэрв’ю з палітычнымі і грамадскімі дзеячамі.
Гасцямі Нофала былі прэм’ер-міністр Славаччыны Робэрт Фіца, былы прэзідэнт Бразіліі Жаір Баўсанару, былы прэм’ер-міністр Пакістану Імран Хан, чалец кіоўнай сям’і Саудаўскай Аравіі Аль Ўалід ібн Таляль Аль Сауд, прадпрымальнік Ілан Маск, амерыканскія бізнесоўцы і кангрэсмены. Блогер кажа, што выступае за тое, каб ЗША і Расея сталіся сапраўднымі саюзнікамі.
Марыя Міхалевіч belsat.eu
