Самалёт «Airbus A330-200», які Беларусь прадала Ірану, вылецеў з Нацыянальнага аэрапорту «Менск» а 19:39 у панядзелак, 30 снежня. Але да кропкі прызначэння ён не даляцеў: праз гадзіну вярнуўся ў беларускую сталіцу ў звязку з тэхнічнымі праблемамі, піша тэлеграм-канал «МотолькоПомоги».
Тэхнічныя няспраўнасці ўзніклі ў самалёта амаль адразу пасля ўзлёту, гаворыцца ў паведамленні. Паводле звестак «Flightradar24», борт знізіўся да 3000 метраў, і над Воршай экіпаж пастанавіў вярнуцца ў Менск, дзе прызямліўся а 20:30.
Самалёт накіроўваўся да новага ўласніка – іранскай авіякампаніі «Toos Airlines».
,,«Борт вылецеў з Менску рэйсам IRT2801. IRT – гэта і ёсць ICAO-код іранскай авіякампаніі "Toos Airlines". У іх у парку цяпер няма ніводнага самалёта, і верагодна рэальным карыстальнікам стане хтосьці з флагманаў (напрыклад, "Mahan Air", як гэта ўжо бывала раней)», – піша «МотолькоПомоги».
Гэты «Airbus A330-200» – адзін з трох, што цягам апошніх шасці месяцаў застаюцца на захоўванні ў Менску.
Марыя Міхалевіч belsat.eu
