Затрыманага падчас пратэстаў у Тбілісі Яўгена Муравіцкага, выпусцілі з СІЗА. Але цяпер яго выклікаюць у міграцыйную службу.
Пра вызваленне Яўгена Муравіцкага стала вядома выданню «Медиазона» ад самога мужчыны.
Паводле Муравіцкага, яго выпусцілі 2 снежня а 7:00. На яго былі складзеныя два пратаколы паводле артукулу «Абраза спецназаўца». Пасля вызвалення маладзёну не выдалі дакументаў.
На 3 снежня Муравіцкага выклікаюць у міграцыйную службу.
Нагадаем, што 25-гадовага грамадзяніна Беларусі затрымалі ў Тбілісі ў ноч на 29 лістапада. Яго абвінавачвалі ў дробным хуліганстве, а таксама ў непадпарадкаванні паліцыі.
У Грузіі ўжо чацвёртую ноч трываюць пратэсты, звязаныя з фальсіфікацыяй парламенцкіх выбараў і пастановаю, абвешчанаю прэм’ер-міністрам краіны, пра замарожванне перамоваў пра ўступленне ў Еўразвяз да 2028 года. Паліцыя жорстка разганяе пратэстоўцаў, але яны ўсё адно збіраюцца на галоўных вуліцах грузінскай сталіцы ды іншых гарадоў.
Раман Шавель belsat.eu
