Напярэдадні саміту Еўразвязу прэм’ер-міністр Славаччыны Робэрт Фіца заявіў, што імавернасць заканчэння вайны ва Украіне найбліжэйшым часам вельмі высокая, паведамляе славацкае інфармацыйнае агенцтва TASR.
На думку палітыка, паседжанне Еўрапейскай рады пакажа, калі гэта можа адбыцца, «бо нечакана ўсплывае тэма запрашэння Украіны ў NATО, якое, аднак не будзе «бясплатным».
Фіца пацвердзіў, што ўрад Славаччыны выступае за тэрытарыяльную цэласць Украіны і што ён падтрымае любы мірны план, прапанаваны для ўрэгулявання канфлікту. Акрамя таго, палітык заявіў, што на парадку дня ягонага будучага візіту ў Кітай таксама будуць мірныя перамовы.
Адначасова Фіца кажа, што заўсёды імкнуўся да збалансаваных адносінаў з Расеяй. На ягоную думку, варта прызнаць, што расейцы не пакінуць Крыму і іншых тэрыторыяў, такіх як Данецкая і Луганская вобласці. Прэм’ер Славаччыны лічыць, што расейцы захопліваюць усё новыя тэрыторыі, а канфлікт не мае ваеннага развязання.
Фіца адзначыў, што Славаччына працягвае даваць гуманітарную дапамогу Украіне і што найбольш патрэбная электраэнергія. Прэм’ер-міністр разлічвае на супрацу Украіны ў пытанні імпарту нафты і газу ў Славаччыну.
Нядаўна Робэрт Фіца заявіў, што ён як кіраўнік ураду ніколі не пагодзіцца на ўступленне Украіны ў NATO, бо гэта можа зрабіцца нагодай для трэцяй сусветнай вайны, а таксама, што ён хацеў бы аднавіць нармальныя адносіны з Расеяй пасля заканчэння поўнамаштабнай вайны, развязанай Пуціным ва Украіне.
Марыя Міхалевіч belsat.eu
