Намеснік кіраўніцы Аб‘яднанага пераходнага кабінету Беларусі, лідар НАУ Павел Латушка запрасіў сустрэчу з польскімі чыноўнікамі, каб высветліць, ці могуць для беларусаў прыпыніць у Польшчы права на атрыманне прытулку.
12 кастрычніка прэм'ер-міністр Дональд Туск заявіў, што 15 кастрычніка прэзентуе на пасяджэнні ўраду новую міграцыйную стратэгію. Яна прадугледжвае «часовае тэрытарыяльнае прыпыненне права на прытулак». Гэта частку плану палітыка, які мусіць «звясці нелегальную міграцыю да мінімуму».
Як патлумачыў 14 кастрычніка намеснік міністра ўнутраных спраў і адміністрацыі Польшчы Мацей Душчык, гаворка ідзе пра папраўкі да двух законаў – аб абароне замежнікаў і аб замежніках.
,,«На падставе дэбатаў у Сейме і Сенаце і подпісу прэзідэнта – тут павінен быць дасягнуты кансэнсус аб тым, пры якіх умовах можа адбыцца прыпыненне – затым прымаецца пастанова Савета Міністраў або любая іншая форма, прынятая ў выніку парламенцкай працы, каб усё было ў адпаведнасці з законам», – сказаў Душчык.
Аднак пакуль не вядома, ці азначае гэта, што беларусы дакладна пазбавяцца магчымасці атрымліваць прытулак у Польшчы.
«Мы, канешне, разумеем, калі краіна робіць усё, каб забяспечыць сваю бяспеку, бо прыярытэтам для кожнага ўраду з’яўляецца бяспека дзяржавы і народу гэтай краіны, – кажа “Белсату” Павел Латушка. – З іншага боку мы ўдзячныя польскаму ўраду, польскаму грамадству, што яны прынялі велічэзную колькасць беларусаў, якія вымушана выязджаюць з тэрыторыі Беларусі апошнімі гадамі.
Па розных падліках называецца нават лічба ў 250 тысяч чалавек, якія вымушана з’ехалі ў Польшчу. Польшча – гэта краіна №1, у якую накіроўваюцца беларусы. На сённяшні дзень мы маем афіцыйную інфармацыю аб тым, што на пачатак года 9100 беларусаў атрымалі статус уцекачоў на тэрыторыі Польшчы».
Палітык падкрэслівае, што ўсе гэтыя асобы атрымліваюць такі статус, бо ў адносінах да іх ажыццяўляецца пераслед на тэрыторыі Беларусі.
«Таму для нас вельмі важным з’яўляецца захаванне магчымасці атрымання статусу ўцекача для грамадзян Беларусі, якія вымушана выязджаюць з тэрыторыі Беларусі. І мы спадзяёмся, што такая магчымасць будзе захаваная.
Дзеля таго, каб атрымаць больш дакладныя звесткі, я запрасіў сустрэчу з намеснікам міністра ўнутраных спраў Мацеем Душчыкам, які адказвае за міграцыйную палітыку ва ўрадзе Польшчы. Таксама з кіраўніком ведамства па справе замежнікаў, каб яшчэ раз дакладна атрымаць гэтую інфармацыю і перадаць нашыя засцярогі. Бо для нас важна, для тых, хто ўжо знаходзіцца ў статусе працэдуры разгляду статусу ўцекача, для тых, хто на жаль будзе вымушаны выехаць з Беларусі, каб такая магчымасць была захаваная», – падкрэсліў Павел Латушка.
У ЕЗ ужо негатыўна адрэагавалі на заяву Дональда Туска. 14 кастрычніка прэс-сакратарка Еўракамісіі (ЕК) Аніта Гіпэр падкрэсліла, што, пытанні аховы межаў і абавязанне даваць прытулак замежнікам «не ёсць узаемавыключальнымі».
Прыкладна ў той жа час Дональд Туск зрабіў наступную заяву у сацсетцы «X»:
«Нашым правам і нашым абавязкам з'яўляецца ахова польскай і еўрапейскай мяжы. Яе бяспека не будзе прадметам перамоваў. Ні з кім. Гэта задача, якую трэба выканаць. І мой урад гэтую задачу выканае».
Арсен Рудэнка belsat.eu
