Дэпутат Дзярждумы Канстанцін Затулін у эфіры прапагандысцкай радыёстанцыі «Говорит Москва» заявіў, што Расеі «для перамогі над Украінай» неабходна выкарыстаць тэрыторыю Беларусі, як гэта было напачатку вайны. Палітолаг Валер Карбалевіч назваў гэтую прапанову «асабістай думкай, якая і застанецца ягонай думкаю, мала каму цікаваю».
«Калі мы хочам усё-ткі дамагчыся перамогі, мы мусім выкарыстаць усе магчымасці, у тым ліку і тэрыторыю Беларусі, як гэта было напачатку спецыяльнай вайсковай аперацыі. Гэта, натуральна, патрабуе дамоўленасці з нашым беларускім хаўруснікам, але гэткая дамоўленасць мне падаецца значна больш актуальнаю, чымся размовы пра перамовы аб міры», — сказаў дэпутат Дзяржаўнай думы Канстанцін Затулін.
Ён мяркуе, што ЗСУ здолелі захапіць частку Курскай вобласці, паколькі не чакаюць нападу з тэрыторыі Беларусі, і з украінска-беларускага прымежжа перакінулі войскі.
«Мы жывём у Саюзнай дзяржаве, нават калі Беларусь самая не будзе ў гэтым удзельнічаць, мы гэтага і не чакаем, мы маем права і мусілі б гэты кірунак цяпер выкарыстаць, каб дасягнуць максімальнага поспеху», — заявіў таксама дэпутат.
Палітычны аглядальнік радыё «Свабода» Валер Карбалевіч у каментары «Белсату» адзначыў, што асаблівай увагі гэтым прапановам надаваць не варта, бо Затулін не мае ўплыву на прыняцце рашэнняў у Крамлі:
,,«Роля Дзярждумы ў палітычнай сістэме Расеі сёння блізкая да нулю. Затулін не ўваходзіць у кола людзей, блізкіх да Пуціна. Гэта не тая асоба, якая можа паўплываць на нейкія рашэнні. Гэтая ягоная асабістая думка, якая і застанецца ягонай думкаю, мала каму цікаваю».
Пры гэтым Карбалевіч канстатаваў, што Расея сапраўды можа зноў выкарыстаць тэрыторыю нашай краіны для ўварвання ва Украіну, і дазволу ў Аляксандра Лукашэнкі, які лічыць сябе прэзідэнтам, ніхто пытаць не будзе:
,,«Тэарэтычна паўтарыцца, канешне, можа. Прычым я не думаю, што ў Лукашэнкі будуць пытаць, заходзіць ці не заходзіць, таму што мінулым разам, мяркую, Лукашэнка і сам не ведаў, што беларуская тэрыторыя будзе выкарыстана Расеяй для нападу на Украіну. І калі раптам Расея захоча паўтарыць гэта, то, думаю, не будуць тут асабліва пытаць у Лукашэнкі».
Зрэшты, як мяркуе суразмоўца «Белсату», Расея цяпер не мае патрэбы ў прадаўжэнні лініі фронту:
,,«Цяпер гэта маларэальна, таму што Украіна гатовая да гэтай атакі, там створаная вялікая лінія абароны на мяжы, плюс там ёсць натуральныя перашкоды: рэкі, балоты. З вайсковага гледзішча наступ на Украіну з тэрыторыі Беларусі цяпер проста немэтазгодны. Ён быў мэтазгодны тады, калі існавала канцэпцыя “Кіеў за тры дні”, калі думалі, што ніякага супраціву не будзе. А цяпер, калі апынулася, што гэта не так, гэты варыянт не вельмі сёння Расеі выгодны, таму і абмяркоўваць яго лічу не вартым. Ва ўсякім разе, ніякіх прыкметаў гэтага няма».
У любым разе, як падсумаваў Карбалевіч, Лукашэнка актыўна падтрымоўвае Расею ў вайне. Такім падтрыманнем можна лічыць і перасоўванне беларускіх войскаў да ўкраінскай мяжы, што мае на мэце «адцягнуць украінскія войскі ад Данбасу, ад Курскай вобласці і падцягнуць да беларускай мяжы»:
,,«Плюс ваенна-прамысловы комплекс Беларусі актыўна працуе на вайну Расеі супраць Украіны, нейкае ўзбраенне, беларуская тэхніка пастаўлялася раней, кажуць, што і цяпер працягвае пастаўляцца ў Расею, якая выкарыстоўваецца ў вайне. Плюс дыпламатычная, палітычная, ідэалагічная падтрымка, падтрымка на розных міжнародных пляцоўках — гэта ўсё ёсць падтрымка Расеі, і пакуль гэтага дастаткова. Ніякіх прыкметаў таго, што Крэмль прымушае Лукашэнку ўступіць у вайну беларускімі войскамі, пакуль я не бачу».
Упершыню Расея выкарыстала беларускую тэрыторыю для нападу на Украіну ў самым пачатку вайны, калі расейскія войскі ўварваліся з некалькіх кірункаў. Тады сілы агрэсара перакідвалі ў Беларусь нібыта дзеля вучэнняў.
Аляксандр Дзегцяроў, Сцяпан Кубік, «Белсат»
