«Агенцтва тэлевізійных навінаў», якое ўваходзіць у структуру Белтэлерадыёкампаніі, анансавала 28 жніўня запуск новага тэлеканалу, які назвалі «Першы інфармацыйны». Разам з ім маюць запусціць партал News.by. Дату пачатку працы не абвяшчалі.
«Першы інфармацыйны» называюць першым у Беларусі тэлеканалам, які будзе перадаваць навіны 24 гадзіны на дзень і 7 дзён на тыдзень. Ён будзе створаны на базе «Агенцтва тэлевізійных навінаў» (АТН).
Старшыня Белтэлерадыёкампаніі Іван Эйсмант распавёў, што выпуск навінаў на канале можа цягнуцца аж 4 гадзіны ў жывым эфіры. Але пакуль плануюць, што навіны будуць выходзіць штогадзіну.
28 жніўня гатовасць тэлеканалу да запуску правяралі Наталля Эйсмант – жонка Івана Эйсманта і прэс-сакратарка Аляксандра Лукашэнкі, намеснік старшыні адміністрацыі Лукашэнкі Уладзімір Перцаў і міністр інфармацыі Марат Маркаў.
Паралельна з тэлеканалам плануюць запусціць навіновы партал News.by. На момант публікацыі сайт недасяжны, але з рэгістрацыйных звестак дамэну вынікае, што яго стварылі 29 траўня 2024 года.
Калі менавіта плануюць запусціць тэлеканал і сайт, не паведамляюць.
На БТ абяцаюць, што канал дасць беларусам «самую актуальную, цікавую, правераную і важную інфармацыю». Аднак АТН, на базе якога ствараюць канал, не раз распаўсюджвала непраўдзівую інфармацыю і палітычную прапаганду праз іншыя каналы сеткі БТ.
Цяпер у сетцы БТ шэсць асноўных тэлеканалаў: «Беларусь-1», «Беларусь-2», «Беларусь-3», «Беларусь-5», «Беларусь-24» і «НТВ-Беларусь», а таксама шэраг рэгіянальных тэлеканалаў у структуры «Беларусь-4». Асобна ад гэтай структуры дзейнічаюць дзяржаўныя тэлеканалы АНТ і СТВ.
Асноўным дзяржаўным навіновым інтэрнэт-парталам застаецца «БелТА», але свой сайт мае і БТ. А шэраг дзяржаўных установаў вядзе ананімныя Telegram-каналы з намёкамі на сувязь з гэтымі ўстановамі: прэс-служба Лукашэнкі вядзе Telegram-канал «Пул первого», Міністэрства замежных справаў – «Глас МИДа», сілавікі ў супрацы з прапагандыстамі – «Жёлтые сливы», і гэтак далей.
Найбольш папулярны інтэрнэт-партал Беларусі, Tut.by, быў разгромлены ўладамі ў 2021 годзе, частку каманды кінулі за краты. Частка каманды, якая пакінула краіну, стварыла новы партал: Zerkalo.io. Дзяржаўнай альтэрнатывы Tut.by за тры гады не стварылі.
«Белсат» – адзіны беларускі тэлеканал, не залежны ад уладаў Беларусі. Глядзець «Белсат» можна праз спадарожнік, праз Youtube і іншымі шляхамі.
Алесь Наваборскі belsat.eu
