Аляксандр Лукашэнка 26 сакавіка распавядаў, як дапамагаў Расеі лавіць тэрарыстаў, якія ўчынілі страляніну ў маскоўскай канцэртнай залі «Крокус Сіці Хол». Дзяржаўнае інфармагенцтва БелТА перадало заяву Лукашэнкі, якая супярэчыць словам Уладзіміра Пуціна.
Паводле БелТА, Аляксандр Лукашэнка казаў, што «ў Беларусі з першых жа хвілінаў пасля здарэння былі прынятыя асаблівыя захады бяспекі, на ўзроўні спецслужбаў дзеялі паводле загадзя вызначанага алгарытму», і «ў тым ліку з гэтай прычыны тэрарысты не наважыліся ехаць у Беларусь, а рушылі ва Украіну».
«Яны не маглі пайсці ў Беларусь, – сцвярджаў Лукашэнка. – Іхныя куратары (у нас ёсць падазрэнні на некаторых, гэта я Пуціну пазваню, скажу свае падазрэнні) – яны разумелі, што ў Беларусь заходзіць нельга. Бо ў першыя хвіліны, як у Расеі частка вобласці перайшла на ўзмоцнены рэжым бяспекі, так і ў нас. У першыя ж хвіліны мне далажыў старшыня КДБ (ён займаецца антытэрарыстычнымі мерапрыемствамі). Мы паводле самай баявой сітуацыі прывялі ў дзеянне свае падраздзяленні.
Таму яны ў Беларусь ніяк не маглі зайсці. Яны гэта бачылі. Таму адвярнуліся і пайшлі на ўчастак украінска-расейскай мяжы».
Уладзімір Пуцін 23 сакавіка выказваў іншую версію. Паводле яго, тэрарысты «рухаліся ў бок Украіны, дзе, паводле папярэдніх звестак, для іх з украінскага боку было падрыхтавана акно для пераходу дзяржаўнай мяжы».
Адразу пасля тэракту шэраг экспертаў выказваў здагадкі аб тым, што Пуцін абвінаваціць у нападзе Украіну. Аднак кіраўнік Расеі публічна пракаментаваў тэракт толькі на наступны дзень і Украіну згадаў толькі ў кантэксце «акна», не абвінаваціўшы наўпрост. І цяпер Пуцін намякае, што ў тэракце вінаватыя краіны Захаду – «тыя, хто ваюе з Расеяй рукамі кіеўскага рэжыму», але Украіну не вінаваціць наўпрост.
Дырэктар Федэральнай службы бяспекі Расеі Аляксандр Бортнікаў 26 сакавіка прызнаў, што тэракт рыхтавалі радыкальныя ісламісты, прыхільнікі тэрарыстычнай групоўкі «Ісламская дзяржава» (групоўка і сама ўзяла на сябе адказнасць). Гэтую версію ад пачатку называлі найбольш імавернай замежныя і незалежныя расейскія эксперты. Але Бортнікаў заявіў таксама, што тэракту «спрыяла» Служба бяспекі Украіны, і, маўляў, ёсць «напрацоўкі», якія сведчаць аб датычнасці да тэракту Украіны, Злучаных Штатаў і Вялікай Брытаніі.
А сакратар Савету бяспекі Расеі Мікалай Патрушаў 26 сакавіка на пытанне аб тым, хто стаіць за тэрактам, «Ісламская дзяржава» ці Украіна, з усмешкай адказаў: «Вядома, Украіна». Ніякіх доказаў украінскага следу расейскі бок па-ранейшаму не прывёў.
На момант публікацыі ў спісе загінулых 95 імёнаў, але апазнанне працягваецца. Са словаў кіраўніка Следчага камітэту Расеі, на вечар 25 сакавіка загінулымі лічылі 139 чалавек: 40 асобаў ад агнястрэльных раненняў, яшчэ дзве ад спалучэння агнястрэльных і колата-рэзаных ранаў, 45 асобаў у выніку пажару, прычыны смерці астатніх не называлі. Раненні і траўмы рознай ступені цяжкасці атрымалі як мінімум 182 чалавекі.
У Расеі тым часам задаюцца пытаннямі аб павольнай рэакцыі сілавікоў на тэракт, нягледзячы на папярэджанні з боку ЗША ды іншых краінаў аб рыхтаванні тэракту, і аб тым, чаму меркаваным тэрарыстам удалося так далёка ад’ехаць ад Масквы – іх затрымалі, паводле афіцыйнай версіі, непадалёк Бранску, куды ехаць чатыры гадзіны без уліку затораў. З’яўляюцца нават канспіралагічныя тэорыі (кшталту такой) аб датычнасці да тэракту самой ФСБ.
Алесь Наваборскі belsat.eu
