Прэзідэнт РФ Уладзімір Пуцін выступіў са зваротам у сувязі з тэракта ў падмаскоўным «Крокус Сіці Холе», дзе загінулі мінімум 115 чалавек.
Пуцін назваў трагедыю 22 сакавіка «крывавым, варварскім тэрарыстычным актам». Паводле Пуціна, Расея сутыкнулася «не проста са старанна, цынічна спланаваным тэрактам, а з падрыхтаваным і арганізаваным масавым забойствам мірных, безабаронных людзей». Ён параўнаў тое, што адбылося, са злачынствамі нацыстаў на акупаваных тэрыторыях у часы Другой сусветнай вайны. 24 сакавіка абвешчана ў Расеі днём агульнанацыянальнай жалобы.
Паводле прэзідэнта РФ, цяпер ва ўсіх рэгіёнах краіны ўведзены дадатковыя меры антытэрарыстычнага і супрацьдыверсійнага характару.
«Галоўнае цяпер – не даць тым, хто стаіць за гэтай крывавай бойняй, учыніць новае злачынства», – зазначыў ён.
«Што да расследавання гэтага злачынства і вынікаў аператыўна-вышуковых дзеянняў, то цяпер можна сказаць наступнае. Усе чацвёра непасрэдных выканаўцаў тэракту, усе тыя, хто страляў, забіваў людзей, знойдзены і затрыманы.
Яны спрабавалі схавацца і рухаліся ў бок Украіны, дзе, паводле папярэдніх звестак, для іх з украінскага боку было падрыхтавана акно для пераходу дзяржаўнай мяжы», – заявіў Пуцін.
Паводле прэзідэнта РФ, усяго затрымана 11 чалавек. Спецслужбы цяпер працуюць над выкрыццём усіх, хто дапамагаў тэрарыстаў: тых, хто забяспечваў іх транспартам, вызначаў шляхі адыходу ад месца злачынства, рыхтаваў схованы, схованкі са зброяй і боепрыпасамі.
«Усе выканаўцы, арганізатары і заказчыкі гэтага злачынства панясуць справядлівае і непазбежнае пакаранне. Кім бы яны ні былі, хто б іх ні накіроўваў. Паўтару: мы выявім і пакараем кожнага, хто стаіць за спінаю тэрарыстаў, хто рыхтаваў гэтае злачынства, гэты ўдар па Расеі, па нашым народзе», – падкрэсліў прэзідэнт РФ.
Пуцін заявіў, што «наш агульны абавязак цяпер, нашых баявых таварышаў на фронце, усіх грамадзян краіны – быць разам у адным шыхце».
Глеб Нержын belsat.eu