Выявы савецкага тырана размясцілі на галоўнай гарадской плошчы і падпісалі цытатай: «Наша справа слушная, вораг будзе разбіты, перамога будзе за намі».
Пра гэта паведамляе агенцыя «France-Presse».
Паводле аўтара публікацыі, цяпер улады і жыхары Данецку спрабуюць «замазаць зверствы Сталіна» і забываюць пра тое, што ў 30-ыя гады праз гвалтоўную калектывізацыю загінулі каля 5 млн украінцаў.
Лідар самаабвешчанай ДНР Аляксандр Захарчанка заяўляў, што шкадуе пра развал Савецкага Саюзу.
«Савецкі Саюз быў вялікай краінай, і гэта велізарная памылка, што ЦРУ і іншыя спецслужбы разбурылі яе. Еўропа і іншыя краіны тады баяліся нас», – адзначаў Захарчанка.
«France-Presse» падкрэслівае, што пазіцыя ДНР кантрастуе з пастановай афіцыйнага Кіева, які ў траўні гэтага года забараніў выкарыстанне савецкай сімволікі. Па ўсёй Украіне ўжо знеслі некалькі помнікаў Уладзіміру Леніну, што выклікала незадаволенасць з боку шмат каго з жыхароў Данецку.
Аўтар артыкулу падкрэслівае, што ўлады ДНР наўмысна праводзяць палітыку, накіраваную на ідэалізацыю савецкай эпохі. Аднак пры гэтым яны адмаўляюць усё, што «псуе ідэальную карціну».
МЯ, belsat.eu
