Расейская ракета разбурала галоўны праваслаўны храм Адэсы. Яго асвячаў патрыярх Кірыл
Уначы 23 ліпеня падчас расейскага абстрэлу Адэсу ракета патрапіла ў Спаса-Праабражэнскі кафедральны сабор Украінскай праваслаўнай царквы. Пра гэта паведамілі ў Адэскай епархіі УПЦ.
Ракета трапіла проста ў цэнтральны алтар, у выніку чаго часткова разбураны будынак сабора, перакрыцце трох ніжніх паверхаў, значна пашкоджана ўнутранае аздабленне і абразы. Таксама цалкам знішчаныя службовыя памяшканні ніжняй часткі сабора.
Таксама ў царкве пачаўся пажар, які пажарнікам удалося хутка лакалізаваць і патушыць.
Ахоўнік сабору шпіталізаваны.
«Адэская епархія УПЦ у чарговы раз асуджае агрэсію Расеі супраць Украіны, гэты тэрарыстычны акт супраць галоўнай святыні і духоўнага Сэрца гораду Адэсы – Спаса-Праабражэнскага кафедральнага сабора, вакол якога пражываюць мірныя людзі, і сам сабор ніякім чынам не звязаны з ваеннымі аб’ектамі», – заявілі ў епархіі. ️ ️
Адэскі Спаса-Праабражэнскі кафедральны сабор быў закладзены ў 1794 годзе і асвечаны ў 1808 годзе. Яго разбурылі ў 1936 годзе, але ў 2000-я аднавілі на ранейшым месцы. 21 ліпеня 2010 года яго асвяціў патрыярх Маскоўскі Кірыл.
Якуб Хруст belsat.eu
