Валанцёраў разагналі, спісы забаранілі. Што адбываецца ў чарзе па апастыль у Менску?
Ужо два тыдні, як у Беларусі зноў прымаюць дакументы на апастыль. І ўвесь гэты час штодня каля галоўнага консульскага ўпраўлення МЗС у Менску збіраюцца вялізныя чэргі ў некалькі сотняў чалавек. Валанцёрам, якія спрабавалі арганізаваць людзей у чарзе, супрацоўнікі МЗС забаранілі гэта рабіць. Пра тое, што адбываецца каля консульскага ўпраўлення, «Белсату» распавёў мянчук, які ўжо другі тыдзень чакае магчымасці паставіць на свае дакументы апастыль.
«Людзі збіраюцца стаяць і на выходных, каб у панядзелак падацца»
21 сакавіка галоўнае консульскае ўпраўленне МЗС Беларусі аднавіла прыём дакументаў на апастыль. Перад гэтым, 10 сакавіка, нібыта з-за тэхнічных прычынаў прымаць дакументы перасталі. З самай раніцы 21 сакавіка каля консульства сабралася вялізная чарга з ахвочых паставіць апастыль. Людзей не стала менш і пасля таго, як 22 сакавіка стала вядома, што цяпер легалізацыя аднаго дакумента будзе каштаваць 32 рублі (раней – 16 рублёў), а апастыль на адным дакуменце – 160 рублёў (раней – 16 рублёў).
Пачалі з’яўляцца паведамленні, што чаргу спрабавалі разагнаць. Наш суразмоўца (імя папрасіў не называць), які ўжо два тыдні стаіць пад МЗС у чаканні апастылю, кажа, што ў першыя дні людзі стаялі ля самых дзвярэй, была штурханіна, і міліцыі давялося ўмяшацца, каб супрацоўнікі консульства мелі магчымасць прайсці.
Калі чарга станавілася толькі больш, людзі зразумелі, што трэба неяк самаарганізоўвацца. З’явіліся валанцёры, якія складалі спісы, пачалі ладзіць дзяжурствы па 5-6 чалавек па дзве гадзіны, кругласутачна. Людзі змяняліся, маглі хадзіць на працу, распавядае мянчук. Прыходзілі адпаведна са сваімі нумарамі і спакойна падаваліся. Не было ніякага шуму, чарга нікому не перашкаджала.
– Але ўчора (31 сакавіка – рэд.) нейкаму супрацоўніку МЗС раптам не спадабалася, што людзі самаарганізаваліся, і пасля прыёму ён загадаў – усіх валанцёраў і спісы прыбраць, – распавядае мужчына. – У выніку людзі зноў пачалі займаць чаргу з 5 гадзінаў вечара, каб сёння падацца. Зноў стаяць пад дзвярыма МЗС па 12-15 гадзінаў. Сёння, калі я сыходзіў, было 200 чалавек. Кажуць, што збіраюцца і на выходных там стаяць, каб у панядзелак трапіць у консульства.
«Такіх чэргаў каля МЗС не бачыў нават пасля выбараў 2020 году»
Чым супрацоўнікам МЗС не спадабалася самаарганізацыя людзей у чарзе, яны не патлумачылі, кажа наш суразмоўца. Аднак паабяцалі прымаць дакументы хутчэй.
– Сёння выйшаў супрацоўнік, падзяліў чаргу на тых, у каго адзін дакумент, і ў каго два і больш, – кажа мянчук. – У каго адзін дакумент, адразу іх пазбіралі і занеслі ўнутр, а людзям потым аддавалі квіткі. Астатнія засталіся чакаць, іх прымалі ў звычайным рэжыме.
Акрамя таго, павялічылі час прыёму дакументаў – калі раней прымалі з 8 да 10:30 гадзінаў раніцы, то цяпер – да 12:00.
За гэты час паспяваюць прыняць 70-100 чалавек, але гэта вельмі мала, кажа суразмоўца «Белсату».
– У спісах валанцёраў было амаль 3000 чалавек. З іх падацца паспелі толькі каля 800, – зазначае мянчук. – Я такіх чэргаў каля МЗС не бачыў нават пасля падзеяў жніўня 2020 году.
Апастыль – гэта адмысловы штамп, які легалізуе дакументы. Дакумент, выдадзены ў адной дзяржаве, атрымлівае юрыдычную сілу ў іншай пасля прастаўлення апастылю. Ставяць яго на асабістыя, дзелавыя дакументы, а таксама іх копіі і пераклады, завераныя натарыяльна.
Ганна Ганчар belsat.eu
