Спецыялісты кажуць, што новая тэхніка дазволіць значна ашчадзіць падчас уборачнай кампаніі.
Першы ў свеце камбайн з газавым рухавіком стварылі інжынеры гомельскага заводу сельскагаспадарчай тэхнікі на базе самага папулярнага беларускага камбайна «Палессе GS12».
Дырэктар навукова-тэхнічнага цэнтру камбайнабудавання «Гомсельмашу» Аляксандр Шантыка кажа, што галоўная задача, якую ставілі інжынеры, – ашчаджэнне.
«Машына, якая працуе на газавым паліве, у параўнанні з звычайным палівам – гэта мінус 40–60 % эканоміі. На выхадзе мы павінныя атрымаць і атрымліваем больш танны прадукт», – кажа Шантыка.
СТВ падае, што ў Гомельскім раёне ўжо два сезоны адбываюцца выпрабаванні сістэмы запраўкі ў полі.
Васіль Антанюк, намеснік Аляксандра Шантыкі, дадае, што ў Расеі ўжо ёсць цэлыя раёны, дзе на газе працуюць трактары.
«Калі такі камбайн патрапіць у гаспадарку, дзе ўжо наладжаная сістэма, ёсць стацыянарныя запраўкі, то няма ніякіх праблем», – кажа Антанюк.
Яшчэ адзін плюс прыроднага газу – ягоная экалагічнасць: метан лічыцца адным з самых чыстых варыянтаў паліва для рухавікоў унутранага згарання. Матор новых беларускіх камбайнаў адпавядае класу стандарт «Еўра-5».
ДД