Спецдакладчык ААН па сітуацыі з правамі чалавека ў Беларусі Міклаш Харашці ізноў заклікаў афіцыйны Менск неадкладна вызваліць палітвязняў.
Гэта адна з рэкамендацый справаздачы спецдакладчыка, якую агучаць на 69-й сесіі Генеральнай асамблеі ААН у Нью-Ёрку.
У дакладзе адзначаецца, што па стане на ліпень 2014 года ў турмах знаходзяцца сем палітвязняў: Мікалай Статкевіч,Эдуард Лобаў, Мікалай Дзядок,Ігар Аліневіч, Яўген Васьковіч, Арцём Пракапенка і Васіль Парфянкоў.
Спіс палітвязняў паводле ААН аналагічны спісу беларускіх праваабаронцаў з цэнтру «Вясна». Тым часам у кастрычніку быў вынесены яшчэ адзін палітычны вырак. Актывіста з Гомлю Юрыя Рубцова прызналі вінаватым паводле артыкулу «Абраза суддзі». Прысуд выносіла суддзя Цэнтральнага раёну Наталля Вайцехоўская. Да выраку прымянілі амністыю, такім чынам рэальны тэрмін скараціўся да 1,5 гадоў.
МЛ, belsat.eu
