Як стала вядома “Белсату”, цяпер маладафронтавец у працэсе этапавання – яго змясцілі ў Магілёўскае СІЗА.
Як паведаміла кіраўніцтва Горацкай калоніі сваякам палітвязня, Зміцер Дашкевіч з калоніі выбыў. Афіцыйнай інфармацыі, куды яго накіруюць, пакуль няма. Спадарыня Марына, маці яшчэ аднаго зняволенага маладафронтаўца, Эдуарда Лобава, не выключае, што пераводу Змітра Дашкевіча паспрыялі неаднаразовыя звароты ў Дэпартамент выканання пакаранняў ды Генеральную пракуратуру. З заклікамі прыняць адпаведныя захады, каб спыніць ціск на палітвязня і забяспечыць годныя ўмовы ўтрымання, да службовых асобаў звярталіся вядомыя беларускія палітыкі, дзеячы культуры, а таксама сваякі палітзняволеных.
Лідара “Маладога фронту” Змітра Дашкевіча прэвентыўна затрымалі напярэдадні прэзідэнцкіх выбараў і асудзілі на 2 гады нібыта за збіццё выпадковых мінакоў. Адбываць пакаранне палітвязня накіравалі ў Горацкую калонію № 9. Адміністрацыя спецустановы “запісала” Дашкевіча ў злосныя парушальнікі рэжыму і неаднаразова змяшчала ў штрафны ізалятар і памяшканне камернага тыпу. Як стала вядома 13 верасня, Зміцер Дашкевіч абвесціў галадоўку пратэсту. Ён патрабаваў забяспечыць нармальныя побытавыя ўмовы ў карцары, куды яго пасадзілі 17 верасня, а таксама вярнуць яму Біблію.
Падпісваць прашэнне аб памілаванні на імя Аляксандра Лукашэнкі, нягледзячы на ціск адміністрацыі калоніі, Зміцер Дашкевіч адмовіўся. Уплывовая праваабарончая арганізацыя “Міжнародная амністыя” прызнала маладзёна вязнем сумлення.
belsat.eu
