Начальнік Нацыянальнага цэнтру ўпраўлення абаронай РФ Міхаіл Мізінцаў заявіў, што ў Расею з Украіны «эвакуявалі» больш за мільён чалавек, у тым ліку 183 тыс. дзяцей, паведамляюць расейскія медыі.
«Нягледзячы на створаныя Кіевам перашкоды, за мінулыя содні, без удзелу ўкраінскіх уладаў, з небяспечных раёнаў Украіны, Данецкай і Луганскай Народных Рэспублік на тэрыторыю Расейскай Федэрацыі эвакуяваныя 16 480 чалавек, з іх – 3354 дзіцяці, а ўсяго з пачатку спецыяльнай ваеннай аперацыі – ужо 1 002 429 чалавек, з якіх 183 168 дзяцей», – сказаў Мізінцаў.
Таксама ён сцвярджае, што нібыта больш за 2,75 млн замежнікаў і ўкраінцаў папрасілі эвакуяваць іх у Расею, у так званыя ДНР і ЛНР, а таксама на падкантрольныя расейскім вайскоўцам тэрыторыі Запарожскай, Мікалаеўскай, Харкаўскай і Херсонскай вобласцяў Украіны.
Паводле Мізінцава, цяпер у Расеі працуюць больш за 9,5 тыс. цалкам абсталяваных пунктаў часовага размяшчэння.
Раней украінскія ўлады неаднаразова паведамлялі аб фактах прымусовай дэпартацыі ў Расею ўкраінцаў, у тым ліку дзяцей без бацькоў. Пры гэтым украінцам выдаюць дакументы, якія забараняюць пакідаць расейскую тэрыторыю цягам двух гадоў. Таксама на захопленых расейцамі тэрыторыях украінцы праходзяць праз фільтрацыю.
АД belsat.eu