Некалькі дзясяткаў выбухаў чулі жыхары Севастопаля вечарам 23 сакавіка. Кіраўнік акупаванага гораду Міхаіл Развазжаеў заявіў, што гэта была самая масіраваная атака за апошні час. Telegram-канал «Крымский ветер» сцвярджае, што адзін з удараў нанесены па галоўным вузлу спецсувязі Чарнаморскага флоту.
Расейскі губернатар Міхаіл Развазжаеў адсправаздачыўся, што «вайскоўцы адбілі атаку на Севастопаль». Паводле яго, адна ракета трапіла ў офісны будынак, «узровень пашкоджанняў удакладняецца», акрамя таго, абломкамі пашкоджаныя некалькі жылых дамоў. У выніку, як паведаміў чыноўнік, загінуў адзін мужчына, чатыры асобы пацярпелі.
Развазжаеў таксама прыгразіў крымінальнымі справамі мясцовым жыхарам, якія здымалі на відэа абстрэлы і працу СПА: «Тых, хто выкладаў відэа, ужо шукаюць органы».
Паводле непацверджаных звестак, у цэнтры Севастопаля быў атакаваны галоўны вузел спецсувязі Чарнаморскага флоту крылатымі ракетамі «Storm Shadow». Выбухі таксама пралуналі ў раёне лётнішча Бельбек. Акрамя таго, паведамляецца пра ўдар па нафтабазе ў паселішчы Гвардзейскае бліз Севастопаля.
У ЗСУ сцвярджаюць, што паспяхова паразілі ў анексаваным Крыме дэсантныя караблі «Азоў» і «Ямал», цэнтр сувязі, а таксама некалькі аб’ектаў інфраструктуры Чарнаморскага флоту.
Ананімны расейскі Telegram-канал «Кремлевская табакерка» піша, што, паводле крыніцаў у Мінабароны Расеі, у выніку ўдараў «вораг паразіў добра замаскаваны камандны пункт, дзе знаходзіліся больш за два дзясяткі афіцэраў». Акрамя таго, абломкі збітых ракетаў пашкодзілі тры самалёты Су-27 на Бельбеку, адзін узнаўленню не падлягае. Таксама было атакаванае «месца дыслакацыі марпехаў, там сур’ёзныя ахвяры»:
«Агулам у выніку атакі, на жаль, загінулі 34 вайскоўцы, 11 з іх – афіцэры. Яшчэ каля 40 вайскоўцаў параненыя».
Сцяпан Кубік belsat.eu