Улады Ўінчэстэра ў Англіі забаранілі менскаму Свята-Елісавецінскаму манастыру ўдзельнічаць сёлета ў калядным базары. Прычына – падтрыманне манашкамі вайны ва Украіне, піша Telegram-канал «Хрысціянская візія».
Менскі Свята-Елісавецінскі жаночы манастыр не зможа сёлета прыехаць на калядны кірмаш у Англіі. Гарадская рада Ўінчэстэру забараніла гэтай рэлігійнай грамадзе ўдзельнічаць у кірмашы. Такім чынам улады падтрымалі зварот арганізацыяў грамадзянскай супольнасці, якія заклікалі не супрацоўнічаць з манастыром, бо ён падтрымлівае вайну.
Як раней паведамляла «Хрысціянская візія», Свята-Елісавецінскі манастыр, што месціцца ў Навінках, падтрымлівае агрэсію Крамля супраць Украіны не толькі на ўзроўні прапаганды, але і ўдзельнічае ў фінансаванні рыштунку для расейскіх вайскоўцаў, збірае грошы для гэтак званых «ЛНР» і «ДНР».
Калядны кірмаш ва Ўінчэстэры – адзін з самых буйных у Вялікай Брытаніі, штораз яго наведваюць больш за 350 тысяч чалавек. Удзел у ім – гэта магчымасць зарабіць грошы, а таксама папулярызаваць дзейнасць сваёй арганізацыі.
У Свята-Елісавецінскім манастыры працуюць майстэрні, дзе вырабляюць, у прыватнасці, посуд, свечкі, матронкі і адзенне.
Сяргей Крот belsat.eu
