Беларуская бягуння Крысціна Ціманоўская 20 жніўня прыняла ўдзел у чэмпіянаце свету па лёгкай атлетыцы ў Будапэшце. На дыстанцыі 100 метраў яна фінішавала 5-я і не прайшла ў паўфінал, паведамляе Беларускі фонд спартовай салідарнасці.
У нядзелю 20 жніўня ў сталіцы Вугоршчыны Будапэшце прайшоў чвэрцьфінал ЧС па лёгкай атлетыцы. Крысціна Ціманоўская прабегла дыстанцыю 100 метраў з вынікам 11,32 і фінішавала 5-я. Забег быў затрыманы ў выніку фальстарту.
Бягуння не праходзіць у паўфінал. Аднак ужо ў сераду 23 жніўня Ціманоўская будзе бегчы іншую дыстанцыю – 200 метраў.
На чэмпіянаце Ціманоўская прадстаўляе зборную Польшчы.
Надоечы Крысціна Ціманоўская паведаміла, што атрымала допуск да міжнародных спаборніцтваў. Польскі лёгкаатлетычны звяз атрымаў афіцыйны ліст ад міжнароднай федэрацыі, у якім паведамляецца пра скасаванне каранціну для беларускай атлеткі з польскім пашпартам. Такі каранцін уводзяць для спартоўцаў, якія выступалі за адну краіну, а потым пастанавілі атрымаць грамадзянства іншай краіны ды выступаць за яе. У Ціманоўскай акурат такі выпадак: на Алімпіяду ў Токіа ў 2021 годзе яна ездзіла яшчэ як рэпрэзентантка Беларусі.
Допуск на міжнародныя спаборніцтвы адкрывае перад Ціманоўскай магчымасць пазмагацца за ўдзел у Алімпійскіх гульнях.
Марыя Міхалевіч belsat.eu