Дзяржаўная выбарчая камісія Польшчы 17 кастрычніка апублікавала вынікі падліку 100 % галасоў выбараў у Сейм і Сенат, а таксама вынікі рэферэндуму. Кіроўная партыя заняла першае месца ў Сейме і Сенаце, але апазіцыйная кааліцыя разам мае больш галасоў – імаверна, яна і сфармуе ўрад.
Фінальныя вынікі мала адрозніваюцца ад папярэдніх, што былі даступныя ўдзень 16 кастрычніка. Кіроўная партыя «Закон і справядлівасць» ужо не будзе мець паловы мандатаў у Сейме, нават калі пойдзе на кааліцыю з ультраправай Канфедэрацыяй. Больш за палову мае апазіцыя: Грамадзянская кааліцыя, «Трэцяя дарога» і «Новыя левыя».
На выбарах у Сейм (ніжнюю палату парламенту з 460 дэпутатамі) галасы размеркаваліся так:
На выбарах у Сенат (верхнюю палату парламенту) галасы размеркаваліся так:
У Сенаце са 100 месцаў 66 зоймуць прадстаўнікі апазіцыйнай кааліцыі, а «Закон і справядлівасць» атрымае 34 мандаты.
Яўка на выбарах стала рэкорднай для сучаснай Польшчы: 74,38 % на выбарах у Сейм і 74,31 % на выбарах у Сенат. Гэтак шмат не галасавала нават на выбарах 1989 года – першых часткова вольных з часу Другой сусветнай вайны.
Адметна, што на выбарах бывае важны нават адзін голас: у адной з варшаўскіх акругаў разрыў між «Новымі левымі» і Канфедэрацыяй склаў роўна адзін голас.
Канстытуцыя Польшчы не абавязвае прэзідэнта даручаць фармаванне ўраду пераможнай кааліцыі. А дзейны прэзідэнт Анджэй Дуда – былы чалец партыі «Закон і справядлівасць». Цягам 14 дзён з першай сесіі Сейму прэзідэнт мусіць прызначыць прэм’ера, пасля за 14 дзён той мае атрымаць вотум даверу ад прынамсі паловы Сейму, а калі не атрымае, цягам яшчэ 14 дзён прэм’ера мае выбраць сам Сейм. Калі не будзе згоды, можа дайсці да датэрміновых парламенцкіх выбараў.
Яўка на рэферэндум склала 40,91 % – гэта значыць, вынікі рэферэндуму не будуць абавязковыя да выканання. Хоць на ўсе чатыры пытанні рэферэндуму звыш 90 % галасоў – «не», як і заклікалі ўлады, апазіцыя задаволеная, бо нашмат менш за палову выбарнікаў выказаліся так, як хацела кіроўная партыя.
Дзяржаўныя медыі Беларусі апошнім часам моцна «паглыбілі» свае веды Польшчы, а дзяржаўнае інфармагенцтва БелТА нават запусціла польскамоўную версію сайту. Беларуская журналістка-міжнародніца Марыя Садоўская-Камлач тлумачыла «Белсату», што гэта хутчэй падрыхтоўка да наступных выбараў і намаганні дэстабілізаваць Польшчу.
Выказванні Аляксандра Лукашэнкі на карысць польскай апазіцыі яна лічыць спробай папсаваць імідж гэтых палітыкаў – што ўлада, што апазіцыя ў Польшчы салідарныя ў стаўленні да Беларусі.
Алесь Наваборскі belsat.eu