Авіякампанія «Белавія» 16 студзеня паведаміла, што ў Нацыянальным аэрапорце Менск ідзе абнаўленне абсталявання сістэмы апрацавання багажу, што можа выклікаць нават затрыманні рэйсаў.
Працы працягнуцца да 31 сакавіка.
«Гэта можа прывесці да павелічэння часу рэгістрацыі пасажыраў, апрацавання, надгляду і камплектацыі багажу, і, як наступства, да затрымання рэйсаў», – адзначылі ў кампаніі.
«Белавія» просіць улічваць гэтую інфармацыю пры планаванні падарожжаў.
Нагадаем, што згодна з указам Лукашэнкі «Аб дзяржаўным уліку і эксплуатацыі цывільных беспілотных лётных апаратаў» міжнародныя паштовыя адпраўленні і тавары з-за мяжы да ўручэння атрымальнікам мусяць праходзіць дадатковы кантроль у спецыяльных месцах.
Паводле ўказу, міжнародныя паштовыя адпраўленні і тавары перад дастаўкай або ўручэннем адрасату мусяць быць дастаўленыя ў адмысловыя месцы правядзення кантролю. Там іх будуць правяраць на наяўнасць «укладанняў, якія маюць прыкметы наяўнасці цывільных беспілотных лётных апаратаў і авіямадэляў».
Магчыма, менавіта з гэтай мэтай сістэму апрацавання багажу ўсталёўваюць у Нацыянальным аэрапорце.
Якуб Хруст belsat.eu
