Судзяць Ягора Лебядка, Насту Лойку асудзілі 4-ы раз запар. Хроніка пераследу за 14 снежня
Штодня ў Беларусі ўлады працягваюць палітычны тэрор супраць грамадзянаў краіны. Сілавікі хапаюць людзей, у турмах катуюць палітвязняў, а суддзі прызначаюць тэрміны паводле палітычных матываў. «Белсат» сабраў вядомыя факты пераследу за 14 снежня.
У Менскім абласным судзе пачаўся працэс над палітзняволеным вайсковым экспертам Ягорам Лебядком. Пра гэта паведамляе Праваабарончы цэнтр «Вясна».
Судовы працэс вядзе суддзя Алена Міснік. Абвінавачанне Лебядку выстаўленае паводле ч. 1 і ч. 2 арт. 361-4 КК («Спрыянне экстрэмісцкай дзейнасці»).
Чацвёрты раз запар у Менску арыштавалі праваабаронцу Насту Лойку. Суд Першамайскага раёну сталіцы прызначыў ёй чарговыя 15 содняў арышту, піша Telegram-канал «humanconstanta».
Праваабаронца Наста Лойка за кратамі з 28 кастрычніка. Яе прызналі вінаватай паводле арт. 19.1 КаАП («Дробнае хуліганства»). Пасля адбывання тэрміну пакарання суд агучвае ёй чарговы содні арышту.
Сілавікі затрымалі былога інжынера Дэпартаменту аховы. Следчыя распачалі супраць мужчыны крымінальную справу паводле ч. 6 арт. 16 і ч. 3 арт. 130 («Дапамога ў распальванні варожасці, учыненая групай асобаў»). Следчыя сцвярджаюць, што мужчына перадаў адміністратарам «дэструктыўных» рэсурсаў асабістыя звесткі каля 30 былых калегаў, гэтая інфармацыя потым публікавалася ў Telegram-каналах.
Жыхара Наваградчыны Віктара Пільжыса асудзілі за рэпост паведамлення пра двух сілавікоў з Ваўкавыску. Мужчыну пакралі 2-ма гадамі калоніі. У каментарах пра сілавікоў, рэпост якіх зрабіў Віктар Пільжыс, вялося, што адзін з іх, оперупаўнаважаны папраўчай калоніі № 11 Кірыл Дырында, з’яўляецца «удзельнікам здзекаў з палітычных зняволеных у Ваўкавыскай калоніі». А пра міліцыянта папраўчай установы адкрытага тыпу № 29 Максіма Жука згадвалася як пра «саўдзельніка здзекаў з палітычных вязняў на Ваўкавыскай хіміі».
Суд таксама абавязаў Пільжыса выплаціць міліцыянтам 10 тысячаў рублёў у якасці кампенсавання іх маральнай шкоды.
У Віцебску сілавікі зладзілі хапун. Праваабаронцам вядома пра затрыманне Пятруніна, Кульмана, Ларкова. Затрыманыя былі звязаныя з мясцовым гастрапабам «ROK’I PUB».
Роўна год таму агучылі вырак Сяргею Ціханоўскаму: 18 гадоў пазбаўлення волі. Ягоная жонка, абраная прэзідэнтка Святлана Ціханоўская, распавяла «Белсату», як пачуваецца палітвязень і як сям’я падтрымлівае з ім сувязь.
Святлана Ціханоўская кажа, што ейны муж у кепскім стане: Сяргей два месяцы правёў у штрафным ізалятары, дзе было вельмі халодна, ён хварэў. Двойчы яму спрабавалі перадаць лекі, але ў турме медыкаментаў не прынялі. Таксама ў зняволенні ў Сяргея Ціханоўскага стаў пагаршацца зрок.
Алена Аляксандрава belsat.eu
