У КДБ абверглі словы Макея: рэжым конттэрарэстычнай аперацыі ў Беларусі не ўводзіўся
У Камітэце дзяржбяспекі паведамілі, што ў Беларусі не ўведзены рэжым контртэрарыстычнай аперацыі. Інфармацыя пра гэта мае недакладны характар. Аб гэтым перадае БелТА са спасылкай на крыніцу ў беларускай спецслужбе.
«На тэрыторыі Рэспублікі Беларусь контртэрарыстычная аперацыя не праводзілася і цяпер не праводзіцца. Інфармацыя, якая распаўсюджваецца ў інтэрнэце, мае недакладны характар», – адзначыла крыніца ў КДБ.
У КДБ патлумачылі, што контртэрарыстычная аперацыя – гэта спецыяльныя мерапрыемствы па спыненні акту тэрарызму, мінімізацыі яго наступстваў, спыненні дзейнасці тэрарыстычнай арганізацыі, незаконнага ўзброенага фармавання, якія праводзяцца ў мэтах абароны інтарэсаў дзяржавы, забеспячэння бяспекі грамадзян і арганізацый, абясшкоджвання тэрарыстаў.
«Згодна з законам Рэспублікі Беларусь ад 3 студзеня года нумар 77-З «Аб барацьбе з тэрарызмам» рэжым КТА на тэрыторыі краіны ўводзіцца Камітэтам дзяржбяспекі», – падкрэслілі ў ведамстве.
Спецслужба ўдакладніла, што ў краіне «праводзяцца планавыя навучальныя мерапрыемствы ў мэтах падтрымання высокага ўзроўню гатовасці субʼектаў барацьбы з тэрарызмам да выканання задач па прызначэнні». У якасці прыкладу такіх мерапрыемстваў называюцца тактыка-спецыяльныя вучэнні МУС, якія завяршыліся 12 кастрычніка ў Ельску Гомельскай вобласці, якія праходзілі «у цесным узаемадзеянні» з прадстаўнікамі сілавога блоку і органаў мясцовай улады.
Нагадаем, што беларусі міністр знешніх спраў Уладзімір Макей у інтэрвʼю расейскаму выданню «Известия» сказаў, што ў Беларусі ўведзены рэжым контртэрыстычнай аперацыі (КТА). Афіцыйна пра ўвядзенне КТА не абʼяўлялася. Пасля таго, як навіну шырока распаўсюдзілі сусветныя медыі, Макей вымушаны быў апраўдвацца, што яго словы «выхапілі з кантэксту».
Антон Тачняк belsat.eu
