Суд над музыкамі гурта «Nizkiz» пачнецца 19 сакавіка ў судзе Кастрычніцкага раёну Менску.
Вакаліста гурта Аляксандра Ільіна, бас-гітарыста Сяргея Кульшу і бубнача Дзмітрыя Халяўкіна затрымалі 5 студзеня 2024 года.
8 студзеня суд Ленінскага раёну гораду Магілёва разгледзеў адміністратыўныя справы Сяргея Кульшы і Дзмітрыя Халяўкіна паводле арт. 19.11 КаАП («Распаўсюд экстрэмісцкіх матэрыялаў»). Суд над Аляксандрам Ільіным адбыўся 10 студзеня. 17 студзеня ў канале ГУБАЗіКу было апублікаванае чарговае відэа з удзельнікамі гурта «Nizkiz», у якім музыкі казалі пра свой удзел у пратэстах і тое, што «найбліжэйшыя пяць гадоў будуць спяваць у месцах пазбаўлення волі».
Цяпер удзельнікаў гурта абвінавачваюць ва ўдзеле ў пратэстах 2020 года паводле арт. 342 Крымінальнага кодэксу «Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх».
Справу будзе весці суддзя Алена Жывіца.
У лютым праваабаронцы прызналі траіх музыкаў палітзняволенымі.
Раман Шавель belsat.eu
