Ігар Ільяш пра сувязь другога прысуду Кацярыне Андрэевай са справай агента КДБ Васільева
Муж палітзняволенай журналісткі Кацярыны Андрэевай лічыць версію пра сувязь другой крымінальнай справы, заведзенай на яе, са справай «агента на ўдалёнцы» Сяргея Васільева, у якога Кацярына брала інтэрв’ю, «дастаткова пераканаўчай». Пра гэта Ігар Ільяш напісаў на сваёй старонцы ў Facebook.
Ігар Ільяш зазначае, што з моманту другога прысуду, які вынеслі Кацярыне Андрэевай, прайшло ўжо 14 месяцаў, але дагэтуль невядома, «на падставе якіх падзеяў узнікла крымінальная справа». Той факт, што былы агент КДБ Сяргей Васільеў, у якога Кацярына брала інтэрвʼю для «Белсату», вярнуўся ў Беларусь і быў асуджаны ў 2021 годзе паводле таго ж артыкулу, што і журналістка («Здрада дзяржаве»), дазваляе рабіць пэўныя высновы.
Ільяш піша, што ад самага пачатку быў упэўнены, што і другі раз ягоную жонку судзілі за журналісцкі матэрыял, але ўсе «ламалі галаву» – за які. Было шмат версіяў, але «пазл не складаўся», «пакуль калегі не даведаліся пра прысуд Сяргею Васільеву».
Гэта, як лічыць Ігар Ільяш, тлумачыць усе дзіўныя акалічнасці справы, а менавіта тое, што справу супраць Кацярыны Андрэевай распачалі не ў Менску, а ва УКДБ Гомельскай вобласці. Менавіта ў Гомлі жыў і працаваў агент Васільеў.
Гэта таксама тлумачыць, чаму Вярхоўны Суд скарэктаваў фармулёўку выраку Кацярыне з «выдачы дзяржаўных сакрэтаў», як у Васільева, на «шпіянаж» (бо журналістка проста задавала пытанні падчас інтэрвʼю і не магла ведаць дзяржаўных сакрэтаў). Стала таксама ясна, чаму маўчала прапаганда і шматлікія «слівы».
«Ну правільна, занадта далікатная тэма, каб яе ўвогуле закранаць у інфармацыйнай прасторы», – заўважае Ігар Ільяш.
«У мяне амаль не застаецца сумневаў у тым, што вырак Каці звязаны са справай Васільева», – падсумоўвае муж палітзняволенай журналісткі.
Ігар Ільяш заўважае таксама, што цягам амаль пяці гадоў нікому і ў галаву не магло прыйсці, што прафесійна зробленае інтэрвʼю можна абвесціць злачынствам.
У чэрвені 2017 года фатограф-аматар Сяргей Васільеў звярнуўся ў рэдакцыю «Белсату», каб расказаць пра сваю шматгадовую супрацу з КДБ Беларусі. Інтэрв’ю ў Васільева, які на той момант быў у Польшчы, узяла журналістка «Белсату» Кацярына Андрэева. У 2019 годзе Сяргей Васільеў вярнуўся ў Беларусь, і толькі нядаўна стала вядома, што ў 2021 годзе яго асудзілі на 11 гадоў калоніі ўзмоцненага рэжыму за здраду дзяржаве (арт. 356 КК). Палітзняволеная журналістка Кацярына Андрэева другі раз была прысуджаная Гомельскім абласным судом да 8 гадоў калоніі ўзмоцненага рэжыму 13 ліпеня 2022 года. Яе судзілі таксама паводле арт. 356 КК – за «здраду дзяржаве».
Зміцер Міраш belsat.eu
