Гісторыю таго, як жанчыны Беларусі змагаліся за свае правы, даводзіцца збіраць па драбніцах. Як адзначыла Алена Агарэлышава, гендарная даследчыца, лектарка Еўрапейскага каледжу «Liberal Arts» у Беларусі, гэтая гісторыя пераплятаецца з гісторыяй Расеі, мужчынскай гісторыяй. А пасля Кастрычніцкай рэвалюцыі яна была занядбаная.
Аднак экспертка знайшла звесткі і падзялілася з намі: жанчыны нашай краіны бралі гістарычны лёс радзімы ў свае рукі ва ўсе часы, і асабліва цікава звярнуць увагу на ХХ стагоддзе.
«Канец ХІХ і пачатак ХХ стагоддзя – перыяд, калі тэма правоў жанчын становіцца вельмі актуальная і літаральна выходзіць з тэмы правоў чалавека. Тады паўстала пытанне: ці ўсе людзі – людзі, ці ўсе маюць роўныя правы. І пачынаецца шмат грамадскіх дыскусіяў на тэму таго, ці людзі рабы або малыя народы, нацыянальныя меншасці. На жаль, і да сённяшняга дня гэта ўсё яшчэ пытанне, бо рознае стаўленне да канфлікту ва Украіне і ў Афганістане. Нібыта белыя людзі больш важныя за іншых», – звяртае ўвагу Алена Агарэлышава.
Яна адзначыла, што ў тагачаснай палеміцы вялікую ролю адыграла выданне «Дэкларацыі правоў чалавека і грамадзяніна» ў паслярэвалюцыйнай Францыі, дзе гаворка ішла аб правах чалавека ў незалежнасці ад месца, дзе ён нарадзіўся.
«Адна з дзяячак Алямп дэ Гуж напісала ў адказ на той мадэрновы, але ўсё адно не поўны дакумент, сваю «Дэкларацыю правоў жанчыны і грамадзянкі». І высветлілася, што з «Дэкларацыі правоў чалавека» былі выключаныя шмат якія пытанні, датычныя жанчын. Тая ж гісторыя, калі жанчыны не маглі валодаць не толькі маёмасцю, але і не мелі правоў на ўласных дзяцей – права на дзяцей належала толькі бацьку. І ў гэтай плыні абмяркоўвалася тое, што калі жанчыны – людзі, то і яны мусяць мець правы», – распавядае экспертка.
На той момант (канец ХІХ – пачатак ХХ стагоддзя) Беларусь была часткай Расейскай імперыі, у якой таксама паўстала пытанне жаночых правоў. А падчас і пасля Лютаўскай рэвалюцыі – і пытанне выбарчых правоў для жанчын.
«З’явілася шмат партыяў, і ў тым ліку была вялікая кампанія, звязаная з выбарамі ў Думу Расейскай імперыі. Былі жанчыны, якія балатаваліся ў Думу. Шмат у якіх жанчын былі палітычныя амбіцыі», – адзначае даследніца.
Вялікую ролю адыгралі Бястужаўскія курсы – адна з першых жаночых вышэйшых навучальных установаў у Расеі.
«Вельмі шмат жанчын прайшлі праз такія курсы. Гэта было не толькі пра наданне жанчынам ведаў, але і стала такім рассаднікам прагрэсіўных ідэяў для жанчын. Шмат з тых, хто праходзіў Бястужаўскія і іншыя курсы, сталі вядомымі рэвалюцыянеркамі», – падкрэсліла нашая суразмоўца.
«Гэта шматтысячная дэманстрацыя ў Санкт-Пецярбургу. Яе ідэя была – надаць жанчынам выбарчыя правы і больш палітычнай моцы. Усё гэта буяла і на беларускіх землях», – распавяла Алена.
У Беларусі таксама была філія расейскай Лігі раўнапраўя жанчын – Беларуская ліга раўнапраўя жанчын. Ім былі цікавыя палітычныя амбіцыі, адукацыя.
Але ў той час адбываліся і іншыя дэманстрацыі, калі на вуліцы выходзілі жанчыны-сялянкі. Ім было не да выбарчага права і не да адукацыі – іхная мэта была выжыць і вярнуць мужчынаў дадому з фронту:
«Ім літаральна не было за што жыць і як гадаваць дзяцей. Яны выходзілі на дэманстрацыі з лозунгамі «Вярніце нашых мужоў», «Вярніце нашых мужчынаў» і з такімі патрабаваннямі да дзяржавы».
«Жаночыя арганізацыі на рубяжы стагоддзяў» – гэта пералік установаў у Беларусі. Гэтую кнігу можна знайсці ў Нацыянальнай бібліятэцы. У ёй больш за сто старонак, там мала аналітычнага тэксту, а проста спіс арганізацыяў, якія існавалі на той час. Гэта вялікая колькасць для таго часу і той тэрыторыі. Частка з гэтых арганізацыяў займалася так званымі жаночымі пытаннямі, але ж былі і адукацыйныя, і феміністычныя. Гэтая гісторыя была, але цяпер яе выпадае збіраць па драбніцах», – адзначае гендарная даследчыца.
Прычына занядбання ў тым, што прыйшла Кастрычніцкая рэвалюцыя, і маладой дзяржаве была патрэбная жаночая моц, бо востра бракавала мужчынаў.
«Той жаночы рух, які быў да рэвалюцыі, і тыя супольнасці абазвалі буржуазнымі і непажаданымі. Мы нават можам пабачыць розніцу паміж жанчынамі, якія выступалі за свае правы і за тое, каб мужчынаў вярнулі з фронту. Рэвалюцыйны ўрад рабіў стаўку на сялянаў і працоўных. Таму, калі «вырашалася» жаночае пытанне, – ужо былі вялікія падмуркі змагання жанчын за ўласныя правы. А таксама гаворка ішла пра тое, каб жанчына была гатовая і здатная аддаць сябе на карысць дзяржаве. Так, гэта першая краіна ў свеце, якая надала жанчынам выбарчае права, усеагульную адукацыю, права на аборты, права на развод – але менавіта таму, што была вялікая патрэба ў людзях, нават калі гэтыя людзі – жанчыны, і іх трэба было максімальна выпхнуць з дому, каб яны працавалі і паказвалі іншым жанчынам, што гэта магчыма і гэта норма», – распавядае Агарэлышава.
Дарэчы, у той час не было праблемы з фемінітывамі. Разам з новай мовай прадразвёрсткі і калектывізацыі сталі распаўсюджвацца і жаночыя назвы прафесіяў.
Былі і вядомыя бабіны бунты. Звесткі пра такія падзеі захаваліся ў Гомельскай і Берасцейскай вобласцях.
«Гэта выбітная з’ява. Калі пачалася калектывізацыя і сялянаў змушалі аддаваць скаціну і зямлю ў калгасы, вельмі шмат людзей абуралася. І ў сельскай мясцовасці паўсталі жанчыны. У Берасцейскай і Гомельскай вобласцях было шмат заяваў пра тое, што бабы ўзбунтаваліся, узялі вілы і што ў каго было, ды пайшлі вяртаць назад сваю скаціну. А камісары не маглі з гэтым нічога зрабіць. Маральна – яны маглі страляць, збіваць ці ссылаць мужчынаў, а жанчын яны не ўспрымалі як праціўніка. На фота – жанчыны рознага веку, галодныя і змучаныя. Нават маладыя жанчыны не выглядаюць на свой узрост, бо ў іх было вельмі цяжкае жыццё. Камісары думалі, што яны дурныя і нічога не ведаюць, таму жанчыны праз гэтую разгубленасць ураду дамагаліся свайго», – распавядае даследчыца.
Яшчэ адзін маляўнічы прыклад – у Петрыкаве жанчыны атачылі царкву і не аддавалі яе савецкай уладзе. Ім было важнае рэлігійнае жыццё, і такім чынам жанчыны паказвалі сваю пазіцыю.
«Гэта былі складаныя часы, шмат крыві, стратаў, і не найлепшы час, каб жыць на гэтай зямлі. Але можна адзначыць і станоўчыя моманты – праз жаночыя бунты, якіх не маглі ніяк спыніць, Сталін падпісаў дэкрэт аб агародах, які дазваляў мець скаціну і зямлю для ўласнага карыстання. Фактычна, гэтыя агароды ўратавалі людзей ад смерці. Гэта было праз тое, што жанчыны знайшлі ў сабе моц заявіць пра сябе.
Гэта не вельмі папулярная старонка гісторыі – і жаночай гісторыі. Але мне падаецца істотным гаварыць пра такія падзеі і з’явы, бо дзякуючы ім удаецца падоўжыць існаванне народу і цэлай нацыі», – абагульняе лектарка Еўрапейскага каледжу «Liberal Arts».
«Жаночая гісторыя Беларусі двойчы занядбаная. Па-першае, калі лічыцца, што жаночае – гэта не такое істотнае. Па-другое, мы былі пад Расейскай імперыяй, і мала хто хоча вывучаць лакальнасць праз тое, што такія з’явы адбываліся на ўсёй вялікай тэрыторыі. А сваё адметнае жыццё было і тут, на нашай зямлі. Таму праз гэтае недаацэньванне губляецца вялікая частка інфармацыі», – адзначыла даследчыца.
Алена распавяла, што ў яе карані з Петрыкаўшчыны, і яна мае вялікую любоў да гісторыі, бо ёй важна ведаць свае карані і адчуваць еднасць з моцнымі жанчынамі сваёй зямлі.
МГМ belsat.eu