Стала вядома, што набліжаны да Аляксандра Лукашэнкі бізнесмен Аляксандр Шакуцін звяртаўся ў агульны суд Еўразвязу, каб зняць з сябе санкцыі. Але справу ён прайграў.
Пра гэта стала вядома 7 чэрвеня з паста журналіста RFE/RL Рыкарда Ёзвяка.
«Добрая перамога для ЕЗ, бо рэжым санкцый у дачыненні Беларусі застаецца ў сіле, а доказы, якія звязваюць яго [Шакуціна] з Лукашэнкам, застаюцца моцнымі», – напісаў журналіст.
Зараз Аляксандр Шакуцін будзе вымушаны сплаціць судовыя выдаткі.
Уладальнік прадпрыемства «Амкадор» Аляксандр Шакуцін, цесна звязаны з Аляксандрам Лукашэнкам, патрапіў пад санкцыі ў снежні 2020 года.
Вядома таксама, што ў суд Еўразвязу з мэтай зняць з сябе санкцыі звярталіся дэпутаты беларускай Палаты прадстаўнікоў Алег Гайдукевіч, Аляксандр Амельянюк, Святлана Любецкая, а таксама старшыня Белтэлерадыёкампаніі Сяргей Гусачэнка. Яны, як і Аляксандр Шакуцін, прайгралі справы.
Раман Шавель belsat.eu