Расейскі парламент ухваліў пагадненне аб супольных вучэбна-баявых цэнтрах, а таксама ратыфікаваў пратакол, што ўносіць змены ў пагадненне аб супольным гарантаванні рэгіянальнай бяспекі ў вайсковай сферы. Абодва гэтыя дакументы ў Дзяржаўную думу ўнёс прэзідэнт Расеі.
Дзяржаўная Дума ратыфікавала пагадненне паміж Расеяй і Беларуссю аб стварэнні і функцыянаванні вучэбна-баявых цэнтраў на тэрыторыі абедзвюх краінаў. Гэты дакумент міністры абароны Сяргей Шайгу і Віктар Хрэнін падпісалі ў Менску ў сакавіку сёлета.
У пагадненні пазначана, што вучэбна-баявыя цэнтры неабходныя «дзеля супольнай падрыхтоўкі вайскоўцаў, практычнай адпрацоўкі задач баявой падрыхтоўкі (баявога дзяжурства) і павышэння ўзроўню зладжанасці і баявой вывучкі».
Адна з мэтаў такіх цэнтраў – «уніфікацыя баявой падрыхтоўкі ўзброеных сілаў» дзвюх краінаў.
Гэтыя базы будуць ствараць у існых вайсковых частках, у якіх канкрэтна, не ўдакладняецца. Дзе яны з’явяцца, колькі там будзе вайскоўцаў, тэрміны фармавання – усё гэта будзе асобна вызначацца міністэрствамі абароны Беларусі і Расеі.
Пра супольныя вучэбна-баявыя цэнтры чыноўнікі ў пагонах загаварылі яшчэ ў 2021 годзе. Паведамлялася, што гэтыя фармаванні з’явяцца ў Гарадзенскай і Ніжагародскай вобласцях, а таксама пад Калінінградам. Плануецца, што на тэрыторыі Беларусі будзе два такія цэнтры, а дзе разгорнуць другі, пакуль не вядома.
На сённяшнім пасяджэнні Дзярждума таксама ратыфікавала пратакол, што ўносіць змены ў пагадненне аб супольным гарантаванні рэгіянальнай бяспекі ў вайсковай сферы. Гэты дакумент датычыць функцыянавання рэгіянальнай групоўкі войскаў.
Абодва дакументы, ухваленыя ніжняй палатаю парламенту, унёс прэзідэнт Уладзімір Пуцін. Цяпер іх разгледзіць верхняя палата – Савет Федэрацыі, а потым іх мусіць падпісаць Пуцін.
Беларускі парламент ратыфікаваў пагадненне аб стварэнні і функцыянаванні вучэбна-баявых цэнтраў яшчэ ў чэрвені.
Сцяпан Кубік belsat.eu
