Ува ўсіх вобласцях Беларусі ўведзеныя абмежаванні на наведванне лясоў, паведамляе БелТА са спасылкаю на сайт Міністэрства лясной гаспадаркі. У большасці раёнаў абмежаванні пачалі дзеяць з апошніх дзён сакавіка.
На раніцу 1 красавіка абмежаванні закранаюць усе раёны Берасцейскай вобласці, а таксама Гарадзенскай, акрамя Шчучынскага і Мастоўскага раёнаў. У Менскай вобласці пад абмежаванні трапілі Салігорскі, Валожынскі, Барысаўскі, Пухавіцкі, Чэрвеньскі і Крупскі раёны.
Уведзеныя абмежаванні на наведванні лясоў у некаторых раёнах Віцебскай, Магілёўскай і Гомельскай вобласцяў.
У большасці раёнаў увялі ІІІ клас пажарнай небяспекі. Гэта значыць, што на тэрыторыю ляснога фонду забаронены ўезд транспартавых сродкаў, на ёй нельга разводзіць вогнішчы, выкарыстоўваць адкрыты агонь, праводзіць работы, не звязаныя з вядзеннем лясной гаспадаркі, а таксама нельга праводзіць масавыя імпрэзы.
Раман Шавель belsat.eu
