Журналісту «Белсату» Ігару Ільяшу прысудзілі 15 содняў нібыта за ўдзел у пікетаванні 26 кастрычніка
Як раз у той дзень, 26 кастрычніка, каля Чырвонага касцёла праходзіў сумесны марш студэнтаў і пенсіянераў, на якім нібыта прысутнічаў журналіст. Аднак у гэты час Ігар накіроўваўся на завод МАЗ па працы.
На судзе Ігар заявіў, што ў вечар затрымання трое невядомых у цывільным адчынілі дзверы яго кватэры ключом, верагодна, тым, які канфіскавалі ў яго жонкі Кацярыны Андрэевай, журналістыкі «Белсату», якая зараз з’яўляецца падазраванай па крымінальнай справе.
Сілавікі паказалі пастанаўленне аб канфіскацыі тэхнікі Кацярыны, але пачалі забіраць і тэхніку Ігара, пра што ён сказаў. У выніку журналіста забралі для дачы паказанняў па справе яго жонкі. Аднак у Цэнтральным РУУС Ільяшу быў прадʼяўлены пратакол аб правапарушэнні.
На судзе адвакат заявіў хадайніцтва аб спыненні справы за недоказам вінаватасці, бо паказанні сведак не адпавядалі рэчаіснасці, каля Чырвонага касцёлу Ігара быць не магло, таму што сведкі адмовілі ў прадстаўленні фатаграфіяў з шэсця, на якім нібыта прысутнічаў Ігар.
«Мая пазіцыя, што трэба дабівацца справядлівасці ў гэтай краіне», – сказаў Ігар у судзе.
Судзіла нашага калегу сумнавядомая суддзя Вікторыя Шабуня.
- 24 лістапада Ігар Ільяш перастаў выходзіць на сувязь. З 19-ай гадзіны тэлефоны журналіста былі недасяжныя. Ён не прыйшоў на сустрэчу з калегамі. У кватэры Ігара Ільяша ягоны брат знайшоў пратакол вымання кампутара, тэлефона і г.д. Каля апоўначы стала вядома, што Ігар утрымліваецца ў ІЧУ на Акрэсціна.
- Жонку Ігара Ільяша, Кацярыну Андрэеву, затрымалі 15 лістапада за стрым на плошчы Пераменаў. Ёй выставілі абвінавачанне ў арганізацыі дзеянняў, якія груба парушаюць грамадскі парадак (арт. 342 КК).
- 24 лістапада Кацярыну Андрэеву праваабаронцы прызналі палітзняволенай.
- Паводле падлікаў Беларускай асацыяцыі журналістаў, за час выбараў і поствыбарчы перыяд ахвярамі пераследу сталі 390 журналістаў, 77 з якіх прайшлі праз адміністратыўны арышт.
