Жаночы «трыумвірат»

Алесь
Дзянісаў
Музыка, журналіст

Аб’яднанне штабоў «новай апазіцыі» і прэс-канферэнцыя трох смелых ды прыгожых жанчын не пакінула нікога абыякавымі. У інтэрнэце іх ужо называюць «дзекабрысткамі». Сам па сабе факт, што яны здолелі аб’яднацца, чаго не далі рады зрабіць усе апазіцыйныя мужчыны за 26 гадоў, дае надзею. Але гэта – эмоцыі. Калі ўключыць галаву, то пытанняў да «трыумвірату» і іх агучанай пазіцыі пакуль што больш, чым адказаў.

Вераніка Цапкала, Святлана Ціханоўская, Марыя Калеснікава. Фота: Ірына Арахоўская / Belsat.eu

Выбары ці байкот?

І раней штабы Віктара Бабрыкі ды Валерыя Цапкалы выказваліся за ўдзел у выбарах, таму зразумела, што гэтая палітыка працягваецца і іхнымі штабамі. Логіка зразумелая: большасць беларусаў прыйдзе і прагаласуе супраць дзейснай улады. Кантроль за сумленнасцю выбарчага працэсу плануецца весці пры дапамозе назіральнікаў ад народу. І цалкам магчыма, што апытанні на выбарчых участках пакажуць, што большасць прагаласавала не за Лукашэнку, а пагалоўны пералік на месцах выявіць несупадзенне лічбаў выбарцаў.

І што далей? Ніхто не перашкаджае ўладзе агучыць тыя лічбы, якія ёй патрэбныя. Адзіны станоўчы эфект ад усяго гэтага, – гэта тое, што большасць народу нарэшце ўбачыць, як яго каторы раз мачаюць галавой у бочку з лайном. Нават тры з паловай мільёны галасоў можна сфальсіфікаваць, спадарыня Калеснікава!

«Трыумвірат» цалкам абвяргае магчымасць і мэтазгоднасць байкоту. Між тым, ніхто не можа гарантаваць таго, што ўлады не пойдуць на далейшы ціск і правакацыі. Па справе Віктара Бабарыкі за кратамі сядзіць дастаткова жанчын, таму сцвярджаць, што жанчын улада не будзе кранаць – цалкам наіўна. Упэўнены, што і на Святлану Ціханоўскую, і на іншых зараз узмоцнена «капаюць». Тым больш, што заўсёды штосьці можна выдумаць. Нашыя сілавікі – такія фантазёры! І тое, што перад імі жанчыны – гэта іх не спыніць. Вось чаму ідэю магчымага байкоту я цалкам бы не адкідваў. І роля масавых назіральнікаў, у дадзеным выпадку, цалкам лагічна ўпісваецца як у выбары, гэтак і ў байкот: зафіксаваць колькасць людзей, якія прыйшлі да выбарчых скрыняў ды магчымыя фальсіфікацыі з яўкай. Эфект аднолькавы.

Фота: Ірына Арахоўская / Belsat.eu

Адзіны кандыдат і «спойлеры»

«Трыумвірат» абвесціў пазіцыю, што яны гатовыя да супрацы з усімі кандыдатамі, якія падзяляюць іх пяць пунктаў праграмы. Прагучала і тое, што «Андрэй Дзмітрыеў падтрымаў нашую ініцыятыву». Усё гэта цалкам для мяне не зразумелае, бо гэта ўсё толькі пустыя словы. Давайце выкажам здагадку, што пасля аб’яднання абсалютная большасць пратэстнага электарату – чытай, большасць беларусаў – на баку Ціханоўскай. У чым дзве «мышкі» могуць быць карыснымі «слану»?

Самае лагічнае, што трэба зараз зрабіць – гэта заклікаць Сяргея Чэрачня ды Андрэя Дзмітрыева не проста супрацоўнічаць, а зняцца з выбараў на карысць Святланы Ціханоўскай. Гэтым самым забіваліся бы два «зайцы». Па-першае, народ бы аб’яднаўся вакол адзінага кандыдата, што паспрыяла бы магчымай перамозе. Па-другое, беларусы нарэшце ўбачылі бы сапраўдны твар гэтых палітыкаў. Між тым, на прэс-канферэнцыі прагучала два супрацьлеглых заклікі: галасаваць за Ціханоўскую ды галасаваць за любога альтэрнатыўнага кандыдата…

Ганна Канапацкая адмаўляецца ад удзелу ў тэледэбатах

Пратэсты

Наконт пратэстаў ніякага плана ў «трыумвірата» не існуе. Спадарыня Ціханоўская выдатна разумее чаму ад яе сышлі прадстаўнікі «Еўрапейскай Беларусі», між тым, на прэс-канферэнцыі яна вырашыла абмінуць гэтае пытанне. І сітуацыя з гэтымі вулічнымі пратэстамі выглядае цалкам горш, чым падчас папярэдніх выбараў. Тое, што яны адбудуцца – у гэтым ніхто не сумняецца. Роўна, як і ў тым, што пратэстоўцаў будуць біць, затрымліваць, катаваць ды інш. Аўтазакаў хопіць! Хопіць і месцаў за кратамі! Не будзе хапаць – павязуць у іншыя гарады, як напрыклад, у 2006 годзе везлі ў Барысаў.

Фота: Ірына Арахоўская / Belsat.eu

Гэта азначае, што патрэбны нейкі інфармацыйны цэнтр, юрыдычная дапамога, каардынацыя з незалежнымі СМІ, стварэнне касы для фінансавай і медычнай дапамогі. Можна не заклікаць да вулічных пратэстаў, можна быць супраць Плошчы, але ж быць гатовымі да яе. Зварот Веранікі Цапкалы да сілавікоў падчас прэс-канферэнцыі : «Хлопцы! Калі ласка! Мы – з вамі! Мы такі ж народ, як і вы!» выглядае кранальным для нас, але не для тых хто лупцуе і катуе людзей. Гэта як крычаць «Міліцыя з народам!» і дарыць ім ружы – наіўнае глупства. Жонка АМАПаўца будзе радая кветкам!

Калі заклікі да сумлення сябраў выбарчых камісіяў і АМАПу – самы моцны аргумент, гэта ўжо параза. Хаця якія могуць быць прэтэнзіі да гэтых моцных жанчын, калі мужчыны не здолелі праявіць мужнасць нават на гэтыя крокі?

Меркаванне аўтараў можа не супадаць з пазіцыяй рэдакцыі.

Больш матэрыялаў