Уначы 21 студзеня ў Томскай вобласці Расеі ахвярамі пажару ў жылым доме сталі 11 чалавек. Пра гэта паведамілі ў Галоўным упраўленні МНС па рэгіёне.
Паведамленне аб загаранні аднапавярховага драўлянага будынку ў пасёлку Прычулымскі Асінаўскага раёна паступіла 21 студзеня а 04:05 па мясцовым часе. На момант прыбыцця выратавальнікаў будынак быў цалкам ахоплены агнём.
З будынку самастойна эвакуяваліся два чалавекі. Пры разборы абваленых канструкцый выяўленыя целы 11 загінулых.
Пажар быў цалкам ліквідаваны а 11:40.
Губернатар Томскай вобласці Сяргей Жвачкін даручыў праваахоўнікам як мага хутчэй высветліць усе акалічнасці пажару і сам узначаліў аператыўны штаб, створаны ў сувязі з надзвычайным здарэннем.
Як паведамляе РИА «Новости», прычынай пажару магло стаць кароткае замыканне абагравальніка. Пачатая крымінальная справа аб прычыненні смерці па неасцярожнасці.
Згарэлае памяшканне было інтэрнатам лесанарыхтоўчай кампаніі ТАА «Грынвуд». У агні загінулі дзесяць грамадзянаў Узбекістану і адна расяянка.
МГ/МВ belsat.eu