27 лістапада ў судзе Бабруйскага раёну і гораду Бабруйску вынесены прысуд па справе Ігара і Алега Букасаў. Ігар Букас асуджаны да чатырох гадоў пазбаўлення волі ў калоніі строгага рэжыму. Алег Букас пакараны двума гадамі пазбаўлення волі ў калоніі агульнага рэжыму, паведамляе «Вясна».
Ігар і Алег Букасы – бацька і сын з Бабруйску – былі затрыманыя 10 жніўня. «Белсат» падрабязна распавядаў пра гэту гісторыю.
У той дзень сям’я Букасаў накіроўвалася ў краму, але не даехала да яе каля ста метраў, бо дарога была ачэпленая з-за акцыі пратэсту. Непадалёк ад месца, дзе Букасы прыпаркавалі машыну, яны заўважылі іншае аўто і аўто ДАІ. Каля гэтых машын нейкая жанчына прасіла адпусціць кіроўцу. Старэйшы Букас вырашыў пацікавіцца, што адбываецца, і падыйшоў да супрацоўніка ДАІ. У выніку ён і яго сын былі гвалтоўна затрыманы.
Пацярпелы маёр Мяншоў папрасіў суд не пазбаўляць волі бацьку і сына Букасаў, бо яны раскаяліся і да таго ж яшчэ ў часе следства папрасілі ў яго прабачэнне. Але суд вырашыў інакш.