Вольскі, «Крама», «Dzieciuki»: 23 сакавіка ў Горадні адбудзецца вялікі канцэрт #БНР101. СТРЫМ

Вялікі канцэрт з нагоды Дня Волі адбудзецца ў гарадзенскім Каложскім парку 23 сакавіка. Падчас свята можна будзе выкарыстоўваць нацыянальную сімволіку.

На святочным канцэрце выступяць: Лявон Вольскі, «Крама», «Dzieciuki», Зміцер Вайцюшкевіч і «Дай дарогу».

Уваход вольны! Пачатак а 13:00. “Белсат” будзе ладзіць онлайн-трансляцыю на Youtube, у сацыяльных сетках і па тэлебачанню.

«Рэйд на Горадню аб’яўляецца адкрытым», – напісаў у сваім «Facebookʼу» адзін з арганізатараў Дня Волі Эдуард Пальчыс.

У сувязі з забаронаю Аляксандра Лукашэнкі праводзіць свята на менскім стадыёне «Дынама» арганізатары Дня Волі – 2019 вырашылі перанесці свята ў Горадню. «Белсат» будзе ладзіць онлайн-трансляцыю на Youtube і ў сацыяльных сетках.

Раней апазіцыйныя палітыкі заявілі, што святкаванне Дня Волі ў Менску адбудзецца 25 сакавіка незалежна ад таго, ці дасць на гэта ўлада свой афіцыйны дазвол.

На канцэрт ды іншыя імпрэзы да Дня Волі беларусы сабралі каля Br 10 000.

ЮВ belsat.eu